ТОЛИБОН КУШТОРИ ТОҶИКОНРО ДАВОМ МЕДИҲАНД. Дар Кобул собиқ вакили парлумон Мурсал Набизода ба қатл расид
ДУШАНБЕ, 17.01.2023 /АМИТ «Ховар»/. Дар Кобул субҳи рӯзи якшанбе, 15 январ собиқ вакили парлумони Афғонистон Мурсал Набизода, ки миллаташ тоҷик мебошад, дар манзили истиқоматиаш аз тири афроди ношинос кушта шуд. Яке аз муҳофизони ӯ низ дар ин ҳамла ба ҳалокат расид. Бародари Мурсал Набизода ва муҳофизи дуюмаш захмӣ гардиданд, хабар медиҳад АМИТ «Ховар» бо истинод ба CNN.
Мурсал Набизодаи 32-сола аз шумори камтарин занони сиёсатмадор буд, ки баъди ба қудрат расидани толибон кишварро тарк накард. Сабаби ҳамла ҳанӯз маълум нест. Муҳофизи сеюм бо пулу ҷавоҳирот аз ҷойи ҳодиса фирор кардааст. Мурсал Набизода дар ошёнаи якуми хонааш, ки онро ҳамчун дафтари корӣ истифода мекард, ҷон додааст.
Намояндаи полиси Кобул Холид Задран иттилоъ дод, ки таҳқиқи ҳодиса оғоз шудааст.
Набизода соли 2018 вакили парлумон аз Кобул интихоб шуд ва то ба қудрат расидани толибон дар ин мақом буд. Ӯ узви Комиссияи мудофиаи парлумон буд ва дар гурӯҳи хусусии ғайридавлатӣ — Пажӯҳишгоҳи рушди инсон ва таҳқиқот фвъолият менамуд.
Собиқ вакили парлумон Марям Сулаймонхил изҳор дошт, ки «ӯ як зани қавӣ буд ва ба он чизе ки бовар дошт, истодагарӣ мекард».
Узви парлумони Аврупо Ҳанна Нейманн гуфт, ки «эҳтимол ӯро дар торикӣ куштаанд, аммо толибон дар рӯзи равшан низоми табъизи ҷинсӣ ҷорӣ кардаанд».
Собиқ вакил рӯирост ба муқобили қонунҳои ҷорикардаи толибон баромад менамуд. Ӯ аз манъи таҳсили занону духтарон ва дигар нақзи ҳуқуқи шаҳрвандӣ интиқод мекард.
Пас аз расидан ба қудрат дар соли 2021 толибон ваъда доданд, ки ҳуқуқи занонро эҳтиром мекунанд, аммо ба зудӣ ба ҷорӣ кардани маҳдудият шурӯъ намуданд. Исломгароён Вазорати кор бо занонро, ки 20 сол боз фаъолият дошт, барҳам доданд, дастрасии духтаронро ба таҳсил дар мактаб ва макотиби олӣ маҳдуд намуданд, занонро аз варзиш маҳрум сохтанд ва барандагони телевизионро муваззаф карданд, ки ҳиҷоб пӯшанд.
Судҳои Афғонистон вазифадор гардиданд, ки қонунҳои шариатро роҳнамоӣ кунанд. Дар кишвар қатлҳои оммавӣ ва ҷазоҳои ҷисмонӣ ҷорӣ карда шуданд.
_________________
* Ҳаракати «Толибон» — барои фаъолияти террористӣ таҳти таҳрими СММ қарор дошта, дар Тоҷикистон, Россия ва соири кишварҳо мамнуъ аст.
АКС: Парлумони Афғонистон/CNN/АМИТ «Ховар»
Дар Тоҷикистон пешгирӣ аз истеъмоли моддаҳои психотропӣ тақвият дода мешавад
Давоми шаш моҳи соли 2026 дар Душанбе 47 ҳолати монеъ шудан ба таҳсилоти ҳатмии ноболиғон ошкор карда шуд
Дар Душанбе беш аз 90 ҳолати ба фолбинӣ машғул шудани шаҳрвандон ошкор гардид
Ҷаласаи Шурои ҳамоҳангсозӣ оид ба пешгирии суиистеъмоли маводи нашъадор баргузор гардид
ТАҲДИДҲОИ МУОСИРИ КИБЕРӢ ВА РОҲҲОИ МУҚОВИМАТ БА ОНҲО. Мулоҳизаҳо дар ин маврид
Дар маҷлиси ҳайати мушовараи Прокуратураи генералӣ татбиқи дурусти Қонуни Ҷумҳурии Тоҷикистон «Дар бораи авф» баррасӣ шуд
Прокурори шаҳри Ҳисор: «Сулҳ масъулият аст ва ташаббуси навбатии байналмилалии Тоҷикистон ҷомеаи ҷаҳониро ба андеша водор месозад»
Дар беш аз 150 аттраксиони боғҳои фарҳангӣ–фароғатии Тоҷикистон камбудиҳои техникӣ ошкор карда шуд
НИШАСТИ МАТБУОТӢ. Қариб 23 ҳазор дона тухми паранда ҳамчун маҳсулоти бесифат ва хавфнок нобуд карда шуд
Дар Хадамоти назорати давлатии бехатарии корҳо дар саноат ва соҳаи кӯҳкорӣ Феҳристи ягонаи электронии субъектҳо таҳия карда мешавад
Ҳайати Тоҷикистон дар амалиёти зерминтақавии зиддимухадиротии СААД дар вилояти Калинингради Русия иштирок намуд
