30-СОЛАГИИ ҚУВВАҲОИ МУСАЛЛАҲ. Бахшида ба ин сана дар Душанбе мусобиқаи варзишӣ оид ба футболи хурд оғоз гардид

ДУШАНБЕ, 07.02.2023. /АМИТ «Ховар»/. 6 феврал дар шаҳри Душанбе мусобиқаи варзишӣ оид ба футболи хурд байни кормандони вазорату идораҳо, ташкилоту муассисаҳои ҷумҳуриявӣ ва корхонаҳои давлатию ғайридавлатӣ оғоз гардид, ки дар он 42 даста иштирок ва байни ҳам рақобат менамоянд. Дар ин бора ба АМИТ «Ховар» сардори Раёсати тарбияи ҷисмонӣ ва инкишофи варзиши дастгоҳи марказии Кумитаи кор бо ҷавонон ва варзиш Муҳаммадтолиб Шокирзода хабар дод.

Мусобиқа бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар ҳамкорӣ бо Федератсияи футболи Тоҷикистон бахшида ба 30-солагии Қувваҳои Мусаллаҳи Ҷумҳурии Тоҷикистон ва Рӯзи пойтахти Ҷумҳурии Тоҷикистон доир карда шуда, дастаҳои ғолиб дар Рӯзи пойтахт бо Ҷом, диплом, туҳфаҳои хотиравӣ ва маблағҳои калони пулӣ аз ҷониби Кумитаи кор бо ҷавонон ва варзиши назди Ҳукумати Ҷумҳурии Тоҷикистон қадрдонӣ карда мешаванд.

Мақсад аз баргузор намудани мусобиқаҳои гуногуни варзишӣ, аз ҷумла футболи хурд байни кормандони вазорату идораҳо ва ташкилоту муассисаҳо тарғиби тарзи ҳаёти солим, ҷалб намудани қишрҳои гуногуни ҷомеа ба машғулияти мунтазами тарбияи ҷисмонӣ ва варзиш ва мустаҳкам намудани алоқаи дӯстии байниҳамдигарӣ мебошад.

АКС: Кумитаи кор бо ҷавонон ва варзиши назди Ҳукумати Ҷумҳурии Тоҷикистон