Бахшида ба 30-солагии таъсиси Қувваҳои Мусаллаҳи Тоҷикистон дар Бохтар ба модари сарбози шаҳидшуда кумак расонида шуд

ДУШАНБЕ, 14.02.2023 /АМИТ«Ховар»/. Дар шаҳри Бохтар бахшида ба 30-солагии таъсиси Қувваҳои Мусаллаҳи Тоҷикистон ба модари сарбози шаҳидшуда Аслам Миникулов барои тарбия намудани фарзанд дар роҳи ватандӯстӣ «Сипоснома» ва маблағи пулӣ тақдим гардид. Дар ин хусус АМИТ «Ховар» бо истинод ба Мақомоти иҷроияи ҳокимияти давлатии шаҳри Бохтар хабар медиҳад.

Бояд гуфт, ки бо қарори Иҷлосияи 13-уми Маҷлиси вакилони халқи шаҳри Бохтар, даъвати шашум муассисаи таҳсилоти миёнаи умумии № 8- и шаҳр ба номи Аслам Миникулов гузошта шудааст.

Ёдовар мешавем, ки сокини шаҳри Бохтар Аслан Миниқулов соли 2021 ба сафи Қувваҳои Мусаллаҳи Ҷумҳурии Тоҷикистон даъват шудааст.

Зимни адои хизмати ҳарбӣ баҳри ҳимояи хоки Ватан аз худ шуҷоату мардонагӣ нишон дода, 14 сентябри соли 2022 қаҳрамонона ҳалок гардид.

Тазаккур дода шуд, ки корномаи ин ҷавони ватандӯст барои ҳазорон ҷавони тоҷик сабақи ватандӯстию ҷавонмардист. Ватану миллат ҳеҷ гоҳ номи фарзандони ҷонфидову ҳомиёни баҳодури худро фаромӯш намекунад.

АКС: Мақомоти иҷроияи ҳокимияти давлатии шаҳри Бохтар