ДУШАНБЕ, 18.02.2023. /АМИТ «Ховар»/. Ба истиқболи 35-солагии  Истиқлолияти давлатии Ҷумҳурии Тоҷикистон дар Ҷамоати деҳоти Чоркӯҳи шаҳри Исфара бунёд, таъмир ва навсозии зиёда аз 100 иншооти таъйиноти гуногун ба нақша гирифта шудааст. Дар ин хусус ба хабарнигори АМИТ «Ховар» дар Ҷамоати деҳоти Чоркӯҳ иттилоъ доданд.

Гуфта шуд, ки Беморхонаи минтақавии №2-и Ҷамоати деҳоти Чоркӯҳ, ки бо 70 кати беморӣ сохта шудааст, дар гузашта ҳолати ногувор дошт. Таъмирталаб будани иншоот ва норасоии дастгоҳу таҷҳизоти муосири ташхису табобат аз мушкилоти асосӣ ба ҳисоб мерафт.

Дар давоми ду соли охир бо дастгирии Ҳукумати мамлакат ва иқдоми соҳиборони саховатпешаю аҳолии деҳот на танҳо иншооти мавҷудаи беморхона пурра навсозӣ карда шуд, балки ду шуъбаи нав низ таъсис ёфт. Вазорати тандурустӣ ва ҳифзи иҷтимоии аҳолии Ҷумҳурии Тоҷикистон беморхонаи минтақавии деҳоти Чоркӯҳро бо дастгоҳу таҷҳизоти ташхису табобат таъмин намудааст.

Ба таъкиди табибон, дар гузашта бо сабаби набудани шароит ва имконияти ташхису табобат сокинон барои оддитарин амалиёти ҷарроҳӣ ва ё муайян намудани беморӣ ба Беморхонаи марказии шаҳри Исфара мерафтанд. Акнун дар Беморхонаи минтақавии деҳоти Чоркӯҳ бо таъсиси шуъбаҳои нави эҳё, ҷарроҳӣ ва осебшиносӣ, ин мушкилот куллан бартараф шуд.

Тазаккур дода шуд, ки барои таъмиру навсозии иншооти Беморхонаи минтақавии деҳоти Чоркӯҳ қариб 2,5 миллион сомонӣ харҷ гардидааст.

Аз ин пеш, ба истиқболи 30-солагии Истиқлолияти давлатии Ҷумҳурии Тоҷикистон дар маркази Ҷамоати деҳоти Чоркӯҳ ва Ҷамоати деҳоти Сурх бо иқдоми соҳибкорон ҳамчунин ду ду нуқтаи ёрии таъҷилии тиббӣ сохта, мавриди баҳрабардорӣ қарор дода шуд. Ҳоло дар ин ду деҳот, гурӯҳи табибон бо ду нақлиёти замонавӣ ба мардум хизмати тиббӣ мерасонанд.

Дар маҷмӯъ Беморхонаи минтақавии №2-и деҳоти Чоркӯҳ дорои шуъбаҳои кӯдакона, таваллуд, эҳё, ҷарроҳӣ ва осебшиносӣ, амрози дарунӣ ва ду нуқтаи ёрии таъҷилии тиббӣ мебошад.

Ҳоло дар беморхонаи мазкур 14 нафар табиб ва зиёда аз 30 нафар кормандони миёнаи тиб фаъолият доранд.

АКС: АМИТ «Ховар»