IRS ХАБАР МЕДИҲАД. Дар километрҳои аз 52 то 73-юми роҳи Душанбе-Чаноқ 45 тармаи хурду бузург фаромад

ДУШАНБЕ, 02.02.2023 /АМИТ «Ховар»/. Шоми 1 феврал дар километрҳои аз 52 то 73-юми роҳи Душанбе — Чаноқ 45 тармаи хурду бузург фаромад, ки дар натиҷа ҳаракати тамоми намуди нақлиёт қатъиян манъ карда шуд. Дар ин хусус АМИТ «Ховар» бо истинод ба филиали «Инновейтив Роуд Солюшнз ЛТД» дар Ҷумҳурии Тоҷикистон хабар медиҳад.

Гуфта шуд, ки аз субҳи барвақт кормандони ширкати мазкур барои бартараф намудани пайомадҳои бориши барф ва тармафароӣ корро оғоз намуданд. Инчунин миқдори зарурии техника низ ба ин кор сафарбар гардидааст.

«Аз ронандагон бо арзи эҳтиром хоҳишмандем, ки бидуни омодагӣ ба роҳ набароянд ва ҳангоми ҳаракат бодиққат бошанд»,-тазаккур доданд дар ширкат.

Бино ба пешгӯии Агенти обуҳавошиносии Тоҷикистон, дар баъзе минтақаҳои мамлакат то 4 феврал ҳавои номусоид ва хатари фаромадани тарма боқӣ мемонад.

АКС: Филиали «Инновейтив Роуд Солюшнз ЛТД» дар ҶТ