«ОМӮЗГОРИ БЕҲТАРИН — 2023». Низомиддин Ҷумъаев дар озмуни байналмилалӣ ғолиб дониста шуд

ДУШАНБЕ, 21.02.2023. /АМИТ «Ховар»/. Муаллими  Муассисаи давлатии таълимии «Литсей №2 барои хонандагони болаёқат»-и шаҳри Душанбе Низомиддин Ҷумъаев дар Озмуни 4-уми байналмилалии «Маҳорати касбӣ» байни довталабони 26 давлати дунё аз рӯйи номинатсияи «Омӯзгори беҳтарин-2023» иштирок намуда, сазовори ҷойи якум ва Дипломи дараҷаи 1 шуд, хабар доданд дар Сарраёсати маорифи шаҳри Душанбе.

Озмун тариқи маҷозӣ (онлайнӣ) бо ташаббуси Федератсияи Русия баргузор гардида, аз рӯи номинатсияҳои «Омӯзгори беҳтарин — 2023», «Роҳбари беҳтарин — 2023», «Методисти беҳтарин — 2023», «Омӯзгор-ташкилотчӣ — 2023», «Беҳтарин коллективи омӯзгорон — 2023» «Мутахассиси ҷавон — 2023» баргузор карда шуд.

Ҳадаф аз баргузории озмун рушди қобилияти эҷодии омӯзгорон, такмили маҳорати касбӣ ва хоҳиши ба даст овардани натиҷаҳои баланд дар таълим, паҳн намудани таҷрибаи пешқадам, дастгирии истифодаи технологияҳои иттилоотию коммуникатсионӣ дар фаъолияти касбӣ, ошкор намудани омӯзгорони болаёқат, дастгирӣ ва хавасманд гардонидани онҳо мебошад.

АКС: Сарраёсати маорифи шаҳри Душанбе