Дар Душанбе Мусобиқаи кушоди варзишӣ оид ба волейболи касбӣ ва ғайрикасбӣ байни занон ҷамъбаст гардид

ДУШАНБЕ, 21.03.2023. /АМИТ «Ховар»/. Имрӯз дар толори варзишии Муассисаи давлатии «Мактаби махсуси варзишии захираҳои олимпии 5 оид ба намудҳои бозиҳои варзишӣ»-и шаҳри Душанбе маросими ҷамъбасти Мусобиқаи кушоди варзишӣ оид ба волейболи касбӣ ва ғайрикасбӣ байни занон барои дарëфти «Ҷоми Раиси шаҳри Душанбе», ки ба Рӯзи Модар бахшида шуда буд, баргузор гардид. Дар ин хусус ба  АМИТ «Ховар»  дар шуъбаи иттилооти дастгоҳи Раиси шаҳри Душанбе иттилоъ доданд.

Мусобиқа байни занони вазорату идораҳо ва ташкилоту муассисаҳо, инчунин дастаҳои бонувони Вилояти Мухтори Кӯҳистони Бадахшон, вилоятҳои Суғду Хатлон, шаҳру ноҳияҳои тобеи марказ ва шаҳри Душанбе доир карда шуд.

Ба ин тартиб дастаҳои ғолиб дар байни варзишгарони ғайрикасбӣ чунин муайян гардид:

Ҷойи якум — дастаи Мақомоти иҷроияи ҳокимияти давлатии шаҳри Душанбе,

Ҷойи дуюм — дастаи Агентии назорати давлатии молиявӣ ва мубориза бо коррупсияи Ҷумҳурии Тоҷикистон,

Ҷойи сеюм — дастаи Сарраёсати маорифи шаҳри Душанбе.

Дастаҳои ғолиб дар байни варзишгарони касбӣ:

Ҷойи якум — дастаи ВМКБ,

Ҷойи дуюм — дастаи шаҳри Душанбе,

Ҷойи сеюм — дастаи вилояти Суғд.

Ғолибон ва ҷоизадорони мусобиқа бо ҷом, диплом, медал ва мукофотҳои пулӣ аз ҷониби Мақомоти иҷроияи ҳокимияти давлатии шаҳри Душанбе ва дастаҳои фаъол бо “Сипоснома”-ҳо қадрдонӣ карда шуданд.

АКС: шуъбаи иттилооти дастгоҳи Раиси шаҳри Душанбе