ДУШАНБЕ, 31.03.2023 /АМИТ «Ховар»/. 30 март дар Вилояти Мухтори Кӯҳистони Бадахшон  зимни машварати назоратии назди раиси вилоят бобати истифодаи самараноку оқилонаи ҳар ваҷаб замин, ба гардиши кишоварзӣ даровардани заминҳои зери юнучқа қарордошта, бақайдгирии хоҷагиҳои деҳқонӣ ва таъмини онҳо бо тухмии хушсифат, мубориза бо ҳашароти зараррасон, омода намудани сардхонаҳо барои нигаҳдории маҳсулоти кишоварзӣ, омодагӣ ба маъракаи кишти баҳорӣ, пешгирии пошхӯрии оилаҳои ҷавон, зӯроварӣ дар оила, иҷрои нақшаву стратегияҳои давлатӣ, риояи интизоми меҳнат ва дигар масъалаҳо ба шахсони мутасаддӣ супоришҳои иловагӣ дода шуд.

Тавре ба АМИТ «Ховар» дар Мақомоти иҷроияи ҳокимияти давлатии вилоят хабар доданд, дар машварат ҳамзамон масъалаҳои рафти омодагӣ ба кишту кори баҳорӣ, маъракаи сабзазоркунӣ ва ободонии маҳалҳои аҳолинишини вилоят, рафти иҷрои қарори раиси вилоят оид ба иҷрои Қарори Ҳукумати Ҷумҳурии Тоҷикистон «Дар бораи Барномаи давлатӣ оид ба пешгирии зӯроварӣ дар оила дар Ҷумҳурии Тоҷикистон барои солҳои 2014-2023» муҳокима карда шуд.

Инчунин ҳисоботи Корхонаи фаръии  «Бадахшонагролизинг» ҷиҳати бо техника ва таҷҳизоти кишоварзӣ таъмин намудани хоҷагиҳои кишоварзии вилоят ва ташкили базаҳои моддии техникии марказҳои хизматрасонии техникӣ дар ноҳияҳои вилоят, пешниҳоди Агентии назорати давлатии молиявӣ ва мубориза бо коррупсияи Ҷумҳурии Тоҷикистон дар вилоят ҷиҳати бартараф намудани камбудиҳое, ки дар ҷараёни санҷиши иҷрои «Стратегияи Ҷумҳурии Тоҷикистон барои давраҳои то соли 2030» ошкор карда шуд ва гузориш оид ба санҷишҳои ногаҳонӣ ҷиҳати таъмини талаботи Қонуни Ҷумҳурии Тоҷикистон «Дар бораи хизмати давлатӣ», Кодекси одоби хизматчии давлатӣ ва Кодекси меҳнати Ҷумҳурии Тоҷикистон дар идораву муассисаҳои вилоят баррасӣ гардид.

Зимни таҳлили масъалаҳо дар машварат аз ҷониби роҳбарияти вилоят ба масъулин барои таъмини саривақтии нақшаю барномаҳои давлатӣ дастури мушаххас дода шуд.

АКС : Вилояти Мухтори Кӯҳистони Бадахшон