ҶУДО. Дар Мусобиқаи байналмилалии Гранд Слами Анталия панҷ паҳлавони тоҷик иштирок мекунад

ДУШАНБЕ, 30.03.2023 /АМИТ «Ховар»/. Тавре қаблан хабар додем, аз 31 март то 2 апрел Мусобиқаи байналмилалии Гранд Слами Анталия оид ба намуди гӯштини ҷудо баргузор мешавад. Дар он панҷ узви дастаи мунтахаби гӯштини ҷудои Тоҷикистон иштирок мекунад. Мавриди тазаккур аст, ки барои иштирок дар ин мусобиқаи сатҳи байналмилалӣ 617 варзишгар (357 мард, 260 зан) аз 85 давлат номнавис шудааст.

Аз ҷумла, Федератсияи ҷудои Тоҷикистон 5 паҳлавони шинохтаро ба шаҳри Анталияи Туркия сафарбар намуд: Муҳаммадсолеҳ Қувватов дар вазни то 60кг, Обид Ҷебов дар вазни то 66кг, Беҳрӯз Хоҷазода дар вазни то 73кг, Шодмон Ризоев дар вазни то 81кг ва Ҷаҳонгир Маҷидов дар вазни то 90кг.

Қобили тазаккур аст, ки рақобатҳо чун анъана дар ҳафт вазн байни мардон ва 7 вазн байни бонувон баргузор мешаванд. Ғолибону ҷоизадорон дар баробари медал бо ҷоизапулӣ қадрдонӣ карда мешаванд: ғолибон дар ҳамаи вазнҳо бо 5000 евро, барандагони медали нуқра бо 3000 евро ва барандагони медали биринҷӣ бо 1500 евро сарфароз мегарданд.

Барномаи мусобиқа:

31 март

Бонувон: -48кг, -52кг, -57кг

Мардҳо: -60кг, -66кг

1 апрел

Бонувон: -63кг, -70кг

Мардҳо: -73кг, -81кг

2 апрел

Бонувон: -78кг, +78кг

Мардҳо: -90кг, -100кг, +100кг

АКС: Федератсияи ҷудои Тоҷикистон