ФУТБОЛ. Низоми кумакдовар аз нимаи дуюми Чемпионати Точикистон-2023 ҷорӣ карда мешавад

ДУШАНБЕ, 11.04.2023 /АМИТ «Ховар»/. Дар Тоҷикистон аз нимаи дуюми чемпионати мамлакат байни дастаҳои Лигаи олӣ низоми кумакдовар (VAR) ҷорӣ карда мешавад. Дар ин хусус ба АМИТ «Ховар» дар Федератсияи футболи Тоҷикистон хабар доданд.  

Ҷорисозии низоми кумакдовар (VAR), ки мебоист аз бозӣ барои Суперҷоми Тоҷикистон-2023 оғоз мешуд, ба далели дермонӣ  дар интиқоли таҷҳизот ба таъхир афтод. Истеҳсолкунандаи таҷҳизот барои Тоҷикистон Slomo.tv аст, ки дорои литсензияи ФИФА мебошад.

Таҷҳизоти зарурӣ аллакай харида шуда, аммо аз ҷониби таъминкунандагон ба таъхир гузошта шуда истодааст. Вақти пешбинишудаи ворид шудани таҷҳизоти системаи кумакдовар аввали моҳи май мебошад.

Ба далели он ки Раёсати доварон ва нозирони Федератсияи футболи Тоҷикистон то ҳол санҷиши амалии доваронро дар мавриди истифодаи системаи кумакдовар анҷом надодааст, тибқи талаботи ФИФА, истифодаи системаи кумакдовар VAR то нимаи дуюми чемпионат дар Тоҷикистон ба таъхир гузошта шуд.

АКС: Федератсияи футболи Тоҷикистон