Дар ноҳияи Роштқалъа шумораи коргоҳҳои хурди ресандагию бофандагӣ зиёд карда мешавад

ХОРУҒ, 14.05.2003. /АМИТ «Ховар»/.  Шумораи корхонаҳои хурди ресандагию бофандагӣ дар деҳаи дурдасти Сежди ноҳияи Роштқалъаи Вилояти Мухтори Кӯҳистони Бадахшон ба чаҳор адад расид. Дар ҳар яке аз ин корхонаҳо аз 15 то 20 нафар занони ҳунарманди деҳа кор карда, аз пашми бузи тибетӣ ва гӯсфандҳои маҳаллӣ маҳсулоти гуногун тавлид мекунанд. Дар ин хусус мухбири минтақавии АМИТ «Ховар» Файз Мирасан хабар додааст.

Раҳима Шириншоева,  коргари яке аз ин коргоҳҳои хурд гуфт, ки  “ҳоло таваҷҷуҳи занону духтарони ҳунарманд ба    эҳёи ҳунарҳои мардумӣ бамаротиб афзудааст. Тавассути таъсиси коргоҳҳои хурди ҳунармандӣ дар як деҳаи мо зиёда аз 70 зану духтари бешуғл бо ҷойи кор таъмин шуд. Аксари занон қаблан низ дар хона ба ресандагию бофандагӣ машғул буданд ва аз ин ҳисоб ризқу рӯзии худро пайдо менамуданд, аммо ин ҷо шароит барои эҷоди ҳар гуна ҳунарҳои дастӣ хеле мусоид аст. Аз сӯи дигар, вақти мо низ хеле хуш мегузарад. Маъмурияти коргоҳ маҳсулоти моро ба фурӯш мегузорад ва моҳонаи моро сари вақт пардохт менамояд”.

Яке аз дигар занони ҳунарманди ин коргоҳ Дунёбегим Худодова, ки солҳои зиёд ба ресандагию бофандагӣ машғул аст, бунёди чунин коргоҳҳоро барои деҳотиён хеле муҳим мешуморад ва мегӯяд, ки “аксари сокинони деҳот аз ҳисоби фурӯши пашми чорвояшон  соҳиби маблағ мегарданд. Аз ин рӯ соҳаи чорводорӣ, ки чанд даҳсола пеш дар ҳоли рукуд буд, дубора рӯ ба тараққӣ овард. Ҳунари мардумӣ беҳтарин навъи санъату фарҳанг аст ва ба ҳаёт, кору рӯзгори мардум робитаи қавӣ дорад. Ин ҳунарҳои аз аҷдодон ба меросмонда ҳамеша аз эҳсоси баланди зебоипарастии миллати мо башорат медиҳанд ва таваҷҷуҳи зиёди сайёҳони хориҷиро низ ба худ ҷалб мекунанд. Аз нисф бештари маҳсулоти мо ба хориҷи мамлакат фурӯхта мешавад”.

Як анъанаи хуби ин коргоҳҳо боз он аст, ки бо хонандагони муассисаҳои таълимии деҳоти атроф робита барқарор намуда, пас аз дарс ба онҳо ҳунари ресандагию бофандагиро ёд медиҳанд.

АКС: АМИТ «Ховар»