Дар Суғд қабули мева барои истеҳсол кардани афшура оғоз ёфт

ДУШАНБЕ, 11.05.2023 /АМИТ «Ховар»/. Дар​ Ҷамъияти саҳомии пӯшидаи «Оби Зулол» қабули мева барои мавсими имсола​ оғоз гардид ва корхона метавонад аз боғдорон меваҳоро харидорӣ ва коркард намояд. Дар ин бора зимни шиносоии роҳбарияти вилояти Суғд бо фаъолияти корхона маълумот дода шуд. Дар ин хусус ба АМИТ «Ховар» дар Хадамоти матбуоти Раиси вилоят хабар доданд.

Бино ба иттилои масъулин, дар корхона коркарди мева ва истеҳсоли афшураҳои гуногун чанд сол аст, ки идома дошта, имсол қабули мева оғоз гардид. Ҳамарӯза аз ноҳияҳои вилояти Хатлон, ки иқлими нисбатан гарм дорад, зиёда аз 20 тонна зардолу қабул карда шуда, дар назар аст, ки соли равон 5 ҳазор тонна зардолу коркард гардад. Корхона имсол дар маҷмуъ беш аз 25 ҳазор тонна меваҳои гуногунро қабул ва коркард мекунад. Аз ин рӯ боғдорони вилоят метавонанд барои ҳамкорӣ ба корхона муроҷиат намуда, меваҳои худро фурӯшанд.​ ​ ​

Бояд гуфт, ки корхонаи маъруфи «Оби зулол»​ соли 2000 мавриди истифода қарор дода шуда, яке аз корхонаҳои калонтарини саноатии шаҳри Истаравшан ба ҳисоб меравад. Масоҳати умумии Ҷамъияти саҳомии пӯшидаи «Оби Зулол» 10 гектарро ташкил медиҳад.​ Самти асосии фаъолияти ҷамъият истеҳсоли нӯшокиҳои ташнагишикан, коркарди меваю сабзавот, истеҳсоли мураббо, афшураҳои мевагӣ ва истеҳсоли ғизои кӯдаконаро дар бар мегирад.

АКС: Хадамоти матбуоти Раиси вилояти Суғд