Дар Суғд оид ба беҳбуди сифати хизматрасонӣ дар Хадамоти шиносномавию бақайдгирӣ машғулият доир шуд

ДУШАНБЕ, 23.05.2023 /АМИТ «Ховар»/. 20 май бо мақсади дуруст ба роҳ мондани ҳуҷҷатгузорӣ дар самти шиносномадорӣ ва беҳбуд бахшидан ба сифати хизматрасонӣ дар шаҳри Гулистони вилояти Суғд барои кормандони зершуъбаҳои хадамоти шиносномавию бақайдгирӣ машғулияти омӯзишӣ баргузор гардид. Дар ин хусус ба АМИТ «Ховар» дар Вазорати корҳои дохилии ҷумҳурӣ хабар доданд.

Дар машғулияти омӯзишӣ аз таҷрибаи коргузории хадамоти шиносномадиҳии давлатҳои хориҷи дуру наздик маълумот дода шуд. Иброз гардид, ки сабукиҳои татбиқшаванда ва ҳарчи содаву дастрас будани хизматрасонии шиносномавию бақайдгирӣ имкон медиҳад, ки соҳаи сайёҳӣ дар Тоҷикистон рушд намояд. Ҷиҳати ноил шудан ба ин мақсад зарур аст, ки кормандони хадамот дар ҳамкорӣ бо ҷузъу томҳои Вазорати корҳои дохилӣ ва дигар мақомоти давлатӣ монеаҳои мавҷударо бартараф намоянд ва ҳарчӣ бештар дар татбиқи Ҳукумати электронӣ дар Ҷумҳурии Тоҷикистон саҳм гузоранд.

Таъкид гардид, ки фароҳам гардидани барномаи давлатии Ҳукумати электронӣ дар хизматрасонии Хадамоти шиносномавию бақайдгирӣ сарборӣ дар иҷрои вазифаи хизматиро коҳиш дода, саргардонии шаҳрвандонро барои ба даст овардани ҳуҷҷати ҳуқуқдиҳанда пешгирӣ менамояд.

Ҳамчунин масъулини Хадамоти шиносномавию бақайдгирии Вазорати корҳои дохилӣ вобаста ба қонуну қарорҳои ҷорӣ ва тағйиру иловаҳои воридшуда сухан гуфтанд.

АКС: Вазорати корҳои дохилии Ҷумҳурии Тоҷикистон