Тоҷикистон ва Эрон ҳамкориро дар бахши сайёҳӣ баррасӣ намуданд

ДУШАНБЕ, 01.05.2023 /АМИТ «Ховар»/. 27-29 апрел намояндагони Сафорати Ҷумҳурии Тоҷикистон дар Ҷумҳурии Исломии Эрон дар барномаҳои фарҳангӣ доир ба эълон кардани шаҳри Ардабил ба унвони пойтахти сайёҳии минтақаи Созмони ҳамкории иқтисодӣ дар соли 2023 иштирок карданд. Дар ин хусус ба АМИТ «Ховар» дар Вазорати корҳои хориҷии Ҷумҳурии Тоҷикистон хабар доданд.

Намояндагони дипломатии Тоҷикистон дар доираи сафар бо вазири мероси фарҳангӣ, гардишгарӣ ва саноеи дастии Эрон, раиси вилояти Ардабил ва шаҳрдори Ардабил мулоқот доир намуданд.

Зимни вохӯриҳо масоили марбут ба тавсеаи ҳамкорӣ дар соҳаи сайёҳӣ байни Тоҷикистон ва Эрон мавриди баррасӣ қарор гирифт. Бо таъкид бар аҳаммияти муштаракоти таърихиву фарҳангӣ ва ҳамзабонии Тоҷикистон ва Эрон ҷонибҳо роҳандозии ҳамкорӣ байни ниҳодҳо ва ҷамъиятҳои сайёҳии ду ҷумҳуриро бо ҳадафи шинохти бештари имконоти сайёҳии якдигар муҳим арзёбӣ карданд.

Дар мулоқотҳо мизбонон ба таҷрибаи шаҳри Душанбе, ки соли 2021 нахустин пойтахти сайёҳии  минтақаи Созмони ҳамкории иқтисодӣ эълон гардида буд, таваҷҷуҳи зиёд зоҳир карданд.

АКС: Вазорати корҳои хориҷии Ҷумҳурии Тоҷикистон