Дар Тоҷикистон фаромадани сел ва ҳодисаҳои ғарқшавӣ ба қайд гирифта шуд

ДУШАНБЕ, 12.06.2023 /АМИТ «Ховар»/. Тайи шабонарӯзи гузашта дар Тоҷикистон сел ба амал омада, бар асари ин офати табиӣ роҳи мошингарди Хоруғ-Ишкошим муваққатан баста шуд. Дар ин хусус Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон иттилоъ медиҳад.

9 июн, соати 20:00 дар деҳаи Воғзи Ҷамоати деҳоти Қозидеҳи ноҳияи Ишкошими Вилояти Мухтори Кўҳистони Бадахшон дар натиҷаи баланд шудани ҳарорати ҳаво ва обшавии барф дар километри 55-уми роҳи «Хоруғ-Ишкошим» сел ба амал омада, роҳи мазкурро баст.

«10 июн бо истифодаи техникаи махсус роҳ тоза карда шуда, ҳаракати нақлиёт барқарор гардид. Хисорот ва талафоти ҷонӣ ба қайд гирифта нашудааст», — тазаккур доданд дар кумита.

Дар қаламрави ҷумҳурӣ дар давоми як шабонарӯзи гузашта ду ҳодисаи нохуш дар обанборҳо ба қайд гирифта шудааст.

9 июн, тақрибан соати 13:20, сокини 31-солаи деҳаи Тутойи Ҷамоати деҳоти Балхоби ноҳияи Муъминобод бо сабабҳои номаълум дар дарёи Сурхоби деҳаи Меҳрободи Ҷамоати деҳоти Гулистони ноҳияи Восеъ ғарқ гардид. Дар рафти корҳои ҷустуҷӯӣ ҷасади шаҳрванд пайдо ва ба пайвандонаш супурда шуд.

Ҳодисаи дуюм дар шимоли мамлакат рух додааст. 9 июн, тақрибан соати 15:00, сокини 10-солаи деҳаи Оламтоби Ҷамоати «Исмоил»-и ноҳияи Бобоҷон Ғафурови вилояти Суғд ҳангоми шиноварӣ дар обанбори сунъии деҳа ғарқ шуд.

Ғаввосони Раёсати Кумитаи ҳолатҳои фавқулода ва мудофиаи гражданӣ дар вилояти Суғд ҷасадро аз об гирифта, ба мақомоти дахлдор супурданд.

Кумита аз шаҳрвандон хоҳиш менамояд, ки қоидаҳои бехатариро риоя намуда, танҳо дар ҷойҳои махсуси муқарраршуда оббозӣ намоянд. Тавсия дода мешавад, ки дар танҳоӣ ва шабона оббозӣ накунанд. Аз волидон хоҳиш карда шудааст, ки кӯдаконро дар соҳилҳои обанборҳо беназорат нагузоранд.

Азиза ИКРОМ,
АМИТ «Ховар»

АКС аз манбаъҳои боз