Дар Ваколатдор оид ба ҳуқуқи инсон бахшида ба Рӯзи Ваҳдати миллӣ ҳамоиши идона доир шуд

ДУШАНБЕ, 25.06.2023. /АМИТ «Ховар»/. 23 июн дар мақомоти Ваколатдор оид ба ҳуқуқи инсон дар Ҷумҳурии Тоҷикистон  бо иштироки роҳбарият ва кормандони ин ниҳод  ба муносибати Рӯзи Ваҳдати миллӣ ҳамоиш  доир  гардид, хабар медиҳад АМИТ «Ховар» бо истинод ба мақомоти мазкур.

Дар нишаст иброз  гардид, ки барои ҳифзи сулҳу субот,  ваҳдату ҳамбастагие, ки имрўз мо дар мамлакат дорему  он бо осонӣ ба даст наомадааст, ҳар яки мо вазифадор мебошем.

«Хурду бузурги сарзамин имрўзҳо бояд дар атрофи  Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон  боз ҳам муттаҳид гашта, барои боз ҳам ободу пешрафта намудани мамлакатамон содиқона кору зиндагӣ намоем»,- гуфта шуд дар ҷамъомад.

Иштирокдорони ҳамоиш   баён доштанд, ки самари ваҳдати миллӣ ва ҳамдилии мардуми шарафманди тоҷик аст, ки имрӯз ташаббусҳои Тоҷикистон, бахасус иқдомҳои Пешвои миллат  дар соҳаи обу иқлим  дар арсаи ҷаҳон дастгирӣ ва пуштибонӣ меёбанд. Мояи ифтихор аст, ки Пешвои тоҷикон барои таъмини ташнагон бо об дар сайёра талош меварзанд ва аз табори миллати инсондўст будани тоҷикро собит месозанд.

Таъкид гардид, ки дастоварҳои мо, зиндагии орому осуда ва рушди корҳои созандагию бунёдкорӣ, пеш аз ҳама дар натиҷаи талошҳои хастанопазири фарзонафарзанде дар симои Асосгузори сулҳу ваҳдати миллӣ-Пешвои миллат, Президенти мамлакат муҳтарам Эмомалӣ Раҳмон дар ҷумҳурӣ ба даст омадааст.

АКС: Хадамоти матбуотии Ваколатдор оид ба ҳуқуқи инсон дар Ҷумҳурии Тоҷикистон