Дар вилояти Суғд маъракаи даъвати баҳорӣ анҷом ёфт

ДУШАНБЕ, 01.06.2023. /АМИТ «Ховар»/. Нақшаи даъвати баҳории ҷавонон ба сафи Қувваҳои Мусаллаҳи Ҷумҳурии Тоҷикистон дар вилояти Суғд пурра иҷро гардид. Дар  ин хусус АМИТ «Ховар» бо истинод ба Хадамоти матбуоти Раиси вилояти Суғд хабар медиҳад.

Тавре маълум аст, ҳамасола тибқи талаботи Қонуни Ҷумҳурии Тоҷикистон «Дар бораи уҳдадории ҳарбӣ ва хизмати ҳарбӣ» ва Фармони ​ Президенти Ҷумҳурии Тоҷикистон дар ду марҳила даъвати шаҳрвандон ба сафи Қувваҳои Мусаллаҳи Ҷумҳурии Тоҷикистон ташкил ва гузаронида мешавад.

Мутобиқи муқаррароти Конситутсияи Ҷумҳурии Тоҷикистон, ҳимояи Ватан, манфиатҳои давлат, таҳкими Истиқлоли давлатӣ ва иқтидори мудофиавии он вазифаи муқаддаси ҳар шаҳрванд дониста шуда, ҷавонон бо ҳисси баланди масъулиятшиносӣ дар муҳлати муқарраргардида ба комиссариатҳои ҳарбии шаҳру ноҳияҳо омада, барои адои хизмати ҳарбӣ номнавис ва ба дар вазъияти тантанавӣ ба хизмат гусел карда мешаванд.

Бояд таъкид намуд, ки таъмини фазои орому осудаи Ватан ва амнияти ҷомеа аз муҳимтарин вазифаҳои давлат маҳсуб шуда, вобаста ба он таълиму тарбия ва руҳану ҷисман омода намудани ҷавонони синни даъватӣ барои хизмат дар сафи Қувваҳои Мусаллаҳи ҷумҳурӣ беш аз пеш аҳамияти муҳим пайдо менамояд.

Корҳои тарғиботию ташвиқотии дар марҳилаи байнидаъватӣ баргузоргардида боиси он шуд, ки шаҳру ноҳияҳои вилоят нақшаи даъватро дар муҳлати муқарраргардида иҷро намоянд. Имрӯзҳо барои будубоши хизматчиёни ҳарбӣ аз ҷониби Ҳукумати Ҷумҳурии Тоҷикистон ва сохторҳои низомии мамлакат шароити хуби хизматӣ ва маишӣ фароҳам оварда шудааст. Бо истифода аз имконият ҳомиёни Ватан ҳамчун муҳофизони содиқу вафодори миллат барои иҷрои вазифаҳои дар наздашон гузошта матонату мардонагӣ нишон дода, дар таҳкими сулҳу суботи давлати нави тоҷикон бо азми қавӣ хизмати намунавӣ хоҳанд кард.

АКС: Хадамоти матбуоти Раиси вилояти Суғд