Тоҷикистон ва Қатар ҳамкориро дар соҳаи сайёҳӣ ва чорабиниҳои тиҷоратӣ густариш медиҳанд

ДУШАНБЕ, 12.06.2023. /АМИТ «Ховар»/. Тавре қаблан иттилоъ додем, 8 июн дар шаҳри Душанбе дар доираи сафари давлатии Амири Давлати Қатар Шайх Тамим ибни Ҳамад Оли Сонӣ ба Ҷумҳурии Тоҷикистон байни ҳукуматҳои ду давлат Ёддошти тафоҳум оид ба ҳамкорӣ дар соҳаи сайёҳӣ ва чорабиниҳои тиҷоратӣ ба имзо расонида шуд.

Дар Кумитаи рушди сайёҳии назди Ҳукумати Ҷумҳурии Тоҷикистон ба АМИТ «Ховар» иттилоъ доданд, ки ҳадафи баимзорасонии санад ба роҳ мондан ва густариш додани ҳамкорӣ дар соҳаи сайёҳӣ ва чорабиниҳои тиҷоратӣ, инчунин ба ин васила тақвият додани маҷмӯи бештари муносибатҳои ҳамкории ду мамлакат, аз ҷумла дар самти иқтисодию тиҷоратӣ ва фарҳангиву башарӣ мебошад.

Бояд тазаккур дод, ки дар доираи ин санад тарафҳо ҳамкориро дар асоси принсипҳои баробарӣ ва манфиати мутақобилаи судманд дар заминаи қонунгузории миллии давлатҳои худ амалӣ менамоянд ва татбиқи он барои манфиат ва беҳбудии мардуми ҳар ду давлат ва рушди равобит байни ширкатҳои сайёҳии ҳар ду ҷониб ба мақсад мувофиқ мебошад.

Амалишавии ин санад барои мубодилаи сайёҳон байни ширкатҳои сайёҳии ҳар ду ҷониб, ҷалби сайёҳони Давлати Қатар ба Ҷумҳурии Тоҷикистон ва дар маҷмуъ барои рушди соҳаи сайёҳии мамлакат мусбӣ арзёбӣ мегардад.

Васеъ ба роҳ мондани ҳамкории судманду ояндадор дар бахши сайёҳӣ ба афзоиши теъдоди сайёҳон, ҳаҷми тиҷорати мутақобила, сармоягузорӣ барои рушди инфрасохтори сайёҳӣ ва ба сатҳи сифатан нав баровардани ҳамкории тарафайн заминаи мусоид фароҳам хоҳад овард.

Соҳаи сайёҳӣ яке аз самтҳои ҷолиб барои ҳамкории минбаъда байни Тоҷикистон ва Қатар ба шумор рафта, санади мазкур барои рушди ҳамкорӣ такони ҷиддӣ хоҳад бахшид.

Ёдовар мешавем, ки дар маҷмуъ, аз рӯйи натиҷаҳои мулоқоту музокироти сатҳи олӣ байни Ҷумҳурии Тоҷикистон ва Давлати Қатар дар ҳузури Сарони давлатҳо муҳтарам Эмомалӣ Раҳмон ва Шайх Тамим ибни Ҳамад Оли Сонӣ 15 санади нави ҳамкорӣ ба имзо расид.

АКС: Хадамоти матбуоти Президенти Ҷумҳурии Тоҷикистон/АМИТ «Ховар»