Дар Таиланд масъалаи рушди варзиши ҷиу-ҷитсу дар Тоҷикистон мавриди баррасӣ қарор гирифт

ДУШАНБЕ, 08.07.2023. /АМИТ «Ховар»/. Раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон, ноиби Президенти Кумитаи миллии олимпии Тоҷикистон Абдулло Раҳмонзода бо намояндаи Федератсияи байналмилалии ҷиу-ҷитсу вохӯрӣ намуд. Дар ин хусус ба АМИТ «Ховар» дар Кумитаи кор бо ҷавонон ва варзиш хабар доданд.

Вохӯрии мазкур зимни баргузории 42-юмин Ассамблеяи генералии ҳисоботию интихоботии Шӯрои Олимпии Осиё, ки дар шаҳри Бангкоки Подшоҳии Таиланд баргузор шуд,  доир гардид.

Дар вохӯрӣ ҷонибҳо масъалаи рушди ҷиу-ҷитсуро дар Тоҷикистон мавриди баррасӣ қарор доданд, инчунин дар ин ҷараён иштироки  дастаи  мунтахаби Тоҷикистон оид ба ҷиу-ҷитсу дар мусобиқаҳои байналмилалӣ, Чемпионати ҷаҳон ва Осиё, ҳамзамон дар Бозиҳои Осиёи мавриди муҳокима қарор гирифт.

Ёдовар мешавем, ки Федератсияи ҷиу-ҷитсуи Тоҷикистон аз ҷониби мақоми ваколатдори давлати дар соҳаи тарбияи ҷисмонӣ ва варзиш, Кумитаи кор бо ҷавонон ва варзиши назди Ҳукумати Ҷумҳурии Тоҷикистон ва Кумитаи миллии олимпии Тоҷикистон, ҳамчун Федератсияи навтаъсис эътироф карда шудааст.

Минъбад Федератсияи ҷиу-ҷитсуи Тоҷикистон, ҳамчун аъзои Иттиҳодияи ҷиу-ҷитсуи Осиё ва Федератсияи байналмилалии ҷиу-ҷитсу дар тамоми мусобиқаҳои сатҳи ҷаҳонӣ Тоҷикистонро намояндагӣ  мекунад.

АКС: Кумитаи кор бо ҷавонон ва варзиши назди Ҳукумати Ҷумҳурии Тоҷикистон