Дар Душанбе 83 нафар собиқадорони соҳаи варзиш қадрдонӣ шуданд

ДУШАНБЕ, 11.08.2023. /АМИТ «Ховар»/. Дирӯз дар шаҳри Душанбе бахшида ба Рӯзи варзишгарони Тоҷикистон ҳамоиши тантанавии фарҳангию фароғатӣ доир гардид. Дар он ба 83 нафар собиқадорони соҳаи варзиш туҳфаҳои арзишманди хотиравӣ тақдим шуд, хабар доданд ба АМИТ «Ховар» дар Раёсати тарбияи ҷисмонӣ ва инкишофи варзиши Кумитаи кор бо ҷавонон ва варзиш.

Барномаи фарҳангиву фароғатӣ дар доираи нақшаи чорабиниҳои Кумитаи кор бо ҷавонон ва варзиши назди Ҳукумати Ҷумҳурии Тоҷикистон дар якҷоягӣ бо Мақомоти иҷроияи ҳокимияти давлатии шаҳри Душанбе амалӣ гардида, зимни он барои собиқадорони соҳа дастурхони идона низ ороста шуд.

Дар ҷараёни баргузории ҳамоиш роҳбарияти  Кумитаи кор бо ҷавонон ва варзиши ҷумҳурӣ, Мақомоти иҷроияи ҳокимияти давлатии шаҳри Душанбе сухан гуфта, аз хизматҳои шоёни ибратбахши онҳо изҳори қаноатмандӣ намуданд.

Ҳамзамон аз таваҷҷуҳу ғамхории Ҳукумати мамлакат, хосса Пешвои миллат муҳтарам Эмомалӣ Раҳмон нисбат ба ин қишри ҷомеа ёдоварӣ гардид. Дар идомаи ҳамоиш ба 83 нафар собиқадорони соҳа туҳфаҳои арзишманди хотиравӣ тақдим намуданд.

Махсусан таъкид шуд, ки давоми соли равон аз ҷониби Ҳукумати Ҷумҳурии Тоҷикистон санаде ба имзо расид, ки ғолибон ва ҷоизадорони бозиҳои олимпӣ, паралимпӣ ва сурдлимпӣ дар Ҷумҳурии Тоҷикистон минбаъд бо стипендияи моддии моҳонаи якумра ҳавасманд мешаванд. Ин иқдом ба пешрафти соҳа мусоидат менамояд.

АКС: Раёсати тарбияи ҷисмонӣ ва инкишофи варзиши Кумитаи кор бо ҷавонон ва варзиш