ФУТЗАЛ. «Истиқлол» ва «Соро компания» дар бозии марказии Суперлигаи Тоҷикистон-2023 ҳисобро мусовӣ намуданд

ДУШАНБЕ,  30.08.2023 /АМИТ «Ховар»/. Бозиҳои даври нуҳуми мусобиқоти Суперлигаи Тоҷикистон-2023 оид ба футзал баргузор шуданд, ки дар бозии марказии давр довталабони асосӣ барои медали тилло- «Истиқлол» ва «Соро компания» бо ҳам рақобат намуданд. Дар ин хусус АМИТ «Ховар» бо истинод ба Федератсияи футболи Тоҷикистон хабар медиҳад.

Бозии «Истиқлол» ва «Соро компания» бо ҳисоби 3:3 ба анҷом расид.

Дар ду рақобати дигари даври нуҳум «Амонатбонк» бар «Самандар» (10:3) ва «Истаравшан» бар «Пойтахт» (5:1) пирӯз шуданд.

Як давр пеш аз анҷоми марҳилаи дуюми Суперлигаи Тоҷикистон-2023 «Истиқлол» бо касби 23 имтиёз дар садри ҷадвал қарор дорад. «Соро компания» дар зинаи дуюм (20 хол) ҷойгир аст. Дебютанти чемпионат «Амонатбонк» (18 хол) дар ҷойи сеюм мавқеъ гирифтааст.

АКС: Федератсияи футболи Тоҷикистон