Ба ғолибону ҷоизадорони Бозиҳои Осиёӣ дар Ханжоу Ҷоизаи Президенти Ҷумҳурии Тоҷикистон дода мешавад

ДУШАНБЕ, 16.09.2023. /АМИТ «Ховар»/. Ба ғолибону ҷоизадорони Бозиҳои Осиёӣ, ки дар шаҳри Ханжоуи Ҷумҳурии Мардумии Чин баргузор мегардад, Ҷоизаи Президенти Ҷумҳурии Тоҷикистон дода мешавад. Дар ин хусус ба шореҳи варзиши АМИТ «Ховар» дар Кумитаи миллии олимпии Тоҷикистон хабар доданд.

Ба варзишгароне, ки дар мусобиқаи мазкур медали тилло мегиранд, 150 000 сомонӣ, медали нуқра 100 000 сомонӣ ва медали биринҷӣ 50 000 сомонӣ мукофотпулӣ дода мешавад.

Ёдовар мешавем, ки Бозиҳои 19-уми Осиёӣ 23 сентябр дар шаҳри Ханжоуи Ҷумҳурии Мардумии Чин шуруъ мегарданд. Ба барномаи бозиҳо 40 намуди варзиш (61 равияи варзишӣ) ворид гардидааст. Ҳайати дастаи мунтахаби Тоҷикистон иборат аз 110 варзишгар дар бозиҳо иштирок менамояд.

Қобили тазаккур аст, ки Бозиҳои Осиё шуруъ аз соли 1951 ҳар чор сол таҳти сарпарастии Шурои олимпии Осиё баргузор мешаванд. Тоҷикистон аз соли 1994 дар ин бозиҳо иштирок намуда, то ин дам 27 медал ба даст овардааст, ки 4-тоаш медали тилло, 6-тоаш медали нуқра ва 17-тоаш медали биринҷӣ мебошад.

АКС аз манбаъҳои боз