Дар Душанбе машғулияти байналмилалии омӯзишии «CollAsia 2023» оғоз ёфт

Сентябрь 18, 2023 15:35

ДУШАНБЕ, 18.09.2023 /АМИТ «Ховар»/. «Қоидаҳои илмии нигоҳубини коллексияҳо (CollAsia 2023)» — таҳти чунин унвон имрӯз дар Душанбе машғулияти байналмилалии омӯзишӣ оғоз гардид, ки дар он роҳбарият ва кормандони Осорхонаи миллӣ ва намояндагони давлатҳои Ҷопон, Дания, Малайзия, Сингапур, Филиппин, Ҳиндустон, Бруней, Бангладеш, Бразилия, Миср, Кения, Урдун, Покистон, Фаластин, Гвинеяи Нав, Тайланд, Узбекистон ва Сербия иштирок доранд. Дар ин хусус ба АМИТ «Ховар» сардори шуъбаи экскурсионӣ ва оммавии Осорхонаи миллии Тоҷикистон Фариддун Кенҷаев иттилоъ дод.

Машғулият бо ташаббуси Осорхонаи миллӣ дар якҷоягӣ бо Маркази байналмилалии тадқиқотӣ оид ба ҳифз ва барқарорсозии мероси фарҳангӣ (ICCROM) ва шарикии Институти миллии тадқиқотии мероси фарҳангии Ҷумҳурии Корея (NRICH) ва Маъмурияти мероси фарҳангии Ҷумҳурии Корея (CHA) бори нахуст дар байни давлатҳои Осиёи Миёна созмон дода шуда, то 6 октябр идома меёбад.

Иброз гардид, ки дар заминаи сиёсати фарҳангпарварона ва дастгириҳои мунтазами Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон соли 2021 Ҷумҳурии Тоҷикистон узви Маркази байналмилалии тадқиқотӣ оид ба ҳифз ва барқарорсозии мероси фарҳангӣ гардид. Ин дастоварди беназири соҳаи осорхонашиносии мамлакат имкон медиҳад, ки мутахассисони ҷавони соҳаи осорхонашиносӣ аз зумраи тармимгарон, таҳкимгарон, бостоншиносон, дизайнерон ва дигар бахшҳои ин соҳа дар даврҳои кӯтоҳмуддати байналмилалӣ иштирок намуда, донишу таҷрибаи тахассусии хешро мукаммал гардонанд.

Дар ин замина Осорхонаи миллӣ тавонист дар муддати кӯтоҳ дар якҷоягӣ бо Маркази байналмилалии тадқиқотӣ оид ба ҳифз ва барқарорсозии мероси фарҳангӣ (ICCROM) бори нахуст дар мамлакат чунин машғулияти байналмилалии омӯзишӣ ташкил намояд.

Машғулият тавассути маърузаҳои сатҳи баланди интерактивӣ, машғулияти амалӣ, аз ҷумла кори гурӯҳӣ ва боздидҳои омӯзишӣ гузаронида шуда, иштироки кормандони бахшҳо ва фарҳангҳои гуногун муҳити мусоид фароҳам меорад. Давоми машғулият бо истифода аз захираҳои мавҷуда ва ташаббусҳои дахлдор алоқамандӣ дар байни илм ва нигоҳубини коллексияҳо дар заминаи маҳаллӣ омӯхта мешавад.

Иштирокдорон дар мисоли муассисаҳои худ сатҳу раванди омӯзиш, табодули таҷрибаҳо, пешниҳоди лоиҳа оид ба беҳтар намудани нигоҳубини коллексияҳо ва устуворӣ дар муассисаҳои худро, ки тавассути истифодаи усулҳои илмӣ амалӣ мегарданд, баён менамоянд.

Машғулият саводнокии илмӣ, иқтидори иштирокдорон ва муассисаҳои онҳоро баланд бардошта, ба онҳо имкон медиҳад, то падидаҳои марбут ба харобшавиро, ки ба коллексияи мероси онҳо таъсир мерасонанд, дарк ва устуворона идора намоянд.

Дар доираи машғулияти байналмилалӣ мутахассисони ботаҷриба аз Ҷопон, Дания, Малайзия ва Сербия бо иштирокчиён омӯзиш мегузаронанд.

АКС: Осорхонаи миллии Тоҷикистон

Сентябрь 18, 2023 15:35

Хабарҳои дигари ин бахш

Дар Тоҷикистон ҳаҷми гардиши савдои яклухт, чакана ва таъмири автомобилҳо афзудааст
«ҶОМИ РАИСИ ШАҲРИ ДУШАНБЕ». Дар Душанбе Чемпионати кушоди варзишӣ оид ба велосипедронӣ доир гардид
Бахшида ба Рӯзи Мавлоно дар ноҳияи Ҷалолиддини Балхӣ ҳамоиши бошукуҳ баргузор шуд
Дурнамои ҳамкорӣ байни минтақаҳои Тоҷикистон ва вилояти Новосибирски Русия баррасӣ гардид
Сафари кории Президенти Ҷумҳурии Тоҷикистон Эмомалӣ Раҳмон дар Олмон оғоз гардид
МУРОҶИАТНОМАИ ҶСК «БАРҚИ ТОҶИК» БА МУШТАРИЁНИ НЕРУИ БАРҚ
Беш аз 500 корманди Бонки миллии Тоҷикистон дар барномаҳои таълимии JVI такмили дониш намудаанд
Дастаи ҷудои Тоҷикистон дар Чемпионати ҷаҳон байни ҷавонон дар Португалия иштирок менамояд
Дар деҳаи Кули Ҷамоати деҳоти Аскалони ноҳияи Рашт бинои нави таълимӣ барои 300 хонанда ба истифода дода шуд
ҶОМИ ТОҶИКИСТОН– 2023. «Истиқлол» бар дастаи футболи «Регар-ТадАЗ»-и шаҳри Турсунзода ғолиб омад
Дар Душанбе ҷаласаи Шурои ҳамоҳангсозии Стратегияи миллии фарогирии молиявии Тоҷикистон доир шуд
Муовини Раиси шаҳри Душанбе бо Директори ширкати «Bina Puri» вохӯрӣ намуд