Давлат Болтаев имкони ба даст овардани аввалин медалро барои Тоҷикистон аз риштаи бокс дар Бозиҳои Осиёӣ пайдо намуд

Сентябрь 30, 2023 12:03

ДУШАНБЕ, 30.09.2023. /АМИТ «Ховар»/. Муштзани тоҷик Давлат Болтаев дар рӯзи шашуми Бозиҳои Осиёии Ханжоу-2022 дар вазни 92 кг, дар даври чаҳорякниҳоӣ бар Эркин Одилбек Уулуи қирғиз бо қарори якдилонаи доварон бо ҳисоби калонӣ 4 бар 0 зафар ёфт ва ба даври ниманиҳоии Бозиҳои Осиёии Ханжоу-2022 баромад.

Бояд гуфт, ки Давлат Болтаев дар сурати бохт дар даври ниманиҳоӣ метавонад соҳиби нишони биринҷӣ гардад ва ё дар сурати пирӯзӣ барои нишони тилло ё нуқра муборизаро идома диҳад. Ҳамин тавр, Давлат Болтаев имкон пайдо менамояд то аввалин медалро дар риштаи бокс дар Бозиҳои Осиёӣ барои Тоҷикистон ба даст орад.

Ёдовар мешавем, ки Давлат Болтаев дар рақобати якум бар Арсланбек Очилови туркман пирӯзӣ ба даст оварда буд.

Қобили тазаккур аст, ки дар даври ниманиҳоӣ 1 октябр Давлат Болтаев бо Ҷаеминг Ҷионг аз Кореяи Ҷанубӣ баҳри роҳ ёфтан ба даври ниҳоӣ нерусанҷӣ менамояд.

Инчунин иштирокчии Бозиҳои тобистонаи Олимпии Токио -2020, муштзани тоҷик дар вазни то 80 кг – Шаббос Негматуллоев дар даври аввали Бозиҳои Осиё музаффарият ба даст овард. Ӯ дар даври аввал бар намояндаи Эрон – Сайидшоҳин Муосавӣ бо қарори якдилонаи доварон бо ҳисоби 4 бар 1 ғалаба намуд ва ба даври чаҳорякниҳоӣ роҳ ёфт. Рақобатҳои даври чаҳорякниҳоӣ 1 октябр доир мегарданд ва Шаббос бо Аҳмад Гусун аз Ироқ қувваозмоӣ менамояд.

Ҳамчунин варзишгари тоҷик Миҷгона Самадова Бозиҳои Осиёии Ханжоу-2022-ро бо ғалаба оғоз намуд. Номбурда дар вазни то 57 кг дар даври аввал бар намояндаи Ветнам – Нгуйен Ҳуен Тран бидуни мушкилӣ бо қарори якдилонаи доварон бо ҳисоби 5 бар 0 музаффарият ба даст овард. Дар даври чорякниҳоӣ Миҷгона Самадова бо Сатсуки Ёшизава аз Ҷопон 1 октябр сабқат менамояд.

Хотиррасон мешавем, ки Бозиҳои Осиёии Ханжоу-2022 23 сентябр оғоз гардида, то 8 октябр идома меёбанд. Дар ин мусобиқа 481 маҷмӯи медалҳо аз рӯи 40 намуди варзиш ба роҳ монда шудааст.

Ба ғолибони Бозиҳои Осиёӣ Ҷоизаи Президенти Ҷумҳурии Тоҷикистон дода мешавад. Ба варзишгароне, ки дар мусобиқаи мазкур медали тилло мегиранд, 150 000 сомонӣ, медали нуқра 100 000 сомонӣ ва медали биринҷӣ 50 000 сомонӣ мукофотпулӣ дода мешавад.

Бо такя ба сиёсати хирадмандонаи Пешвои муаззами миллат баҳри дастгирии варзишгарон дар Бозиҳои 19-уми Осиёӣ қарори дахлдори Раиси шаҳри Душанбе низ ба тасвиб расидааст, ки тибқи он, ба гирандагони медали тилло хонаи 3 ҳуҷрадор, медали нуқра 2 ҳуҷрадор ва медали биринҷӣ хонаи 1 ҳуҷрадор тақдим мегардад.

Меҳрони ҚУРБОН,
АМИТ «Ховар»

АКС аз манбаъҳои боз

Сентябрь 30, 2023 12:03

Хабарҳои дигари ин бахш

ҶУДО. Чемпионати ҷаҳон-2024 дар Абузабӣ баргузор мешавад
ҶОМИ ОСИЁ-2024. Дастаи мунтахаби олимпии Тоҷикистон (U-23) оид ба футбол бо дастаҳои Арабистони Саудӣ, Ироқ ва Тайиланд бозӣ менамояд
Президенти Ҷумҳурии Тоҷикистон Эмомалӣ Раҳмон бо роҳбарон ва фаъолони вилояти Суғд машварати корӣ доир намуданд
Пешвои миллат Эмомалӣ Раҳмон дар шаҳри Истаравшан ба ятимон туҳфаҳо тақдим намуданд
Дар Душанбе мусобиқаи байналмилалии Гран – Слам оид ба гӯштини ҷудо баргузор мегардад
Дар Данғара мусобиқаи кушоди анъанавии ҷумҳуриявӣ оид ба гӯштини миллӣ баргузор мегардад
ФУТБОЛ. Дастаи олимпии Тоҷикистон (U-23) рӯзи сеюми тамринҳоро дар Давҳа ба анҷом расонид
ҶОМИ ОСИЁ-2024. Дар Федератсияи футболи Тоҷикистон вохӯрӣ доир гардид
«ВАССОФИ ВАТАН». Фестивал-озмуни тарғибгари дастовардҳои миллӣ оғоз гардид
Эмомалӣ Раҳмон: Хизмат ба Ватан, яъне хизмати ҳарбӣ, мактаби ҷавонмардӣ ва давраи ҳаматарафа обутоб ёфтани ҷавонон мебошад
Ҳангоми истифодаи хабару маводи сомона истинод ба www.khovar.tj ҳатмӣ аст!
Саҳифаҳои расмии АМИТ «Ховар» дар шабакаҳои иҷтимоӣ: facebook.com/niatkhovar, t.me/niatkhovar, youtube.com/@niat_Khovar_tj, instagram.com/niat_khovar/, twitter.com/niatkhovar, Радиои Ховар 101.5 fm, facebook.com/khovarfm/