Ҳайати Тоҷикистон бо дастовардҳои соҳаи кишоварзии Шоҳигарии Нидерланд шинос гардид

ДУШАНБЕ, 19.10.2023. /АМИТ «Ховар»/. Муовини Вазири кишоварзии Ҷумҳурии Тоҷикистон Нигина Анварӣ дар Шоҳигарии Нидерланд бо дастовардҳои соҳаи кишоварзии ин давлат дар соҳаҳои занҷираи арзиши иловашудаи коркард ва истеҳсоли маҳсулоти растанипарварию чорводорӣ, кластерҳои агросаноатӣ ва нақши илм дар самти беҳтар намудани равандҳои истеҳсолӣ шинос шуд. Дар ин хусус ба АМИТ «Ховар» дар Вазорати кишоварзӣ хабар доданд.

Зимни суҳбату мулоқотҳо ҳайатҳо масъалаҳои таъмини амнияти озуқаворӣ, тағйирёбии иқлим, ҳифзи пиряхҳо, гузариш ба иқтисоди «сабз», идоракунии партовҳо, тақвияти ҳамкорӣ байни бахши хусусию давлатӣ дар доираи лоиҳаҳои мушаххас, баргузории форуми соҳибкорӣ байни ду давлат ва дигар масъалаҳоро мавриди баррасӣ қарор доданд.

Зимнан, дар мавриди табодули таҷриба дар соҳаи кишоварзӣ, омодагӣ ба ҷалби қувваи кории қобили меҳнат дар соҳаи кишоварзӣ ба Нидерланд, ҷорӣ намудани таҷрибаи инноватсионии Нидерланд дар самти парвариш ва содироти маҳсулоти кишоварзӣ, нигоҳ доштани занҷирҳои устувори таъминоти озуқаворӣ, пешбурди тамоюлҳои технологияҳои инноватсионӣ бо таваҷҷуҳ ба ҳалли масъалаҳои тағйирёбии иқлим, истифодаи самараноки захираҳои табиӣ ва ҳифзи гуногунии биологӣ барои баланд бардоштани ҳосилнокии кишоварзӣ изҳори назар гардид.

Инчнунин бо иштироки ҳайати Ҷумҳурии Тоҷикистон ва доираҳои соҳибкории Шоҳигарии Нидерланд ҳамоиш баргузор гардид. Дар он  аз ҷониби муовини Вазири кишоварзӣ доир ба соҳаи кишоварзии Тоҷикистон, фазои соҳибкорию сармоягузорӣ, имконияти сармоягузорӣ дар соҳаҳои мухталифи кишоварзӣ маълумоти муфассал пешниҳод гардид. Ҷонибҳо дар доираи суҳбат барои амалӣ намудани ҳамкории судманд дар самти бунёди корхонаҳои коркарди шир ва гӯшти паранда имконияту иқтидори худро муаррифӣ намуданд.

Бо мақсади таҳкими ҳамкории минбаъда дар соҳаи кишоварзӣ байни Вазорати кишоварзии Ҷумҳурии Тоҷикистон ва Вазорати кишоварзӣ оид ба ҳамкорӣ дар соҳаи кишоварзӣ Ёддошти тафоҳум, инчунин  байни Донишгоҳи аграрии Тоҷикистон ба номи Ш.Шоҳтемур ва Маркази байналмилалии боғдории «Делта» санади дуҷонибаи ҳамкорӣ ба имзо расонида шуданд.

АКС: Маркази матбуот ва иттилооти Вазорати кишоварзии Ҷумҳурии Тоҷикистон