Буҷаи шаҳри Турсунзода бо назардошти андози иҷтимоии ғайрибуҷетӣ ба андозаи 100,7% иҷро гардид

ДУШАНБЕ, 09.10.2023. /АМИТ «Ховар»/. Дар нуҳмоҳаи соли равон дар шаҳри Турсунзода ҳаҷми мол, кор ва хизматрасонӣ 9,3 % афзоиш ёфта, буҷаи шаҳр бо назардошти андози иҷтимоии ғайрибуҷетӣ ба андозаи 100,7% иҷро гардид. Дар ин хусус зимни натиҷагирии  фаъолияти соҳаҳои хоҷагии халқи шаҳр иттилоъ дода шуд.

Тавре дар Мақомоти иҷроияи ҳокимияти давлатии шаҳри Турсунзода ба АМИТ «Ховар» хабар доданд, дар ҷаласаи ҷамъбастӣ, ки таҳти раёсати Раиси шаҳри Турсунзода Парвиз Акрамзода доир шуд, фаъолияти соҳаҳои хоҷагии халқи шаҳр дар нуҳ моҳи соли равон натиҷагирӣ гардид.

Дар ин давра соҳаи саноат 3,9%, кишоварзӣ- 33,2% сохтмон- 1,5%, хизматрасонии пулакӣ 11,4% ва савдо 23,3% афзоиш ёфтааст.

Ҳамзамон дар анҷоми ҷаласаи ҷамъбастӣ  ба ғолибони даври ҷумҳуриявии «Тоҷикистон — Ватани азизи ман» ва даври шаҳрии озмун барои муайян намудани беҳтарин деҳот, деҳа, кӯча ва хонаи истиқоматӣ дар фазои тантанавӣ дипломҳо супорида шуданд.

АКС: Мақомоти иҷроияи ҳокимияти давлатии шаҳри Турсунзода