Дар ноҳияи Варзоб чароғонкунии шоҳроҳи Душанбе-Чанок ва маҳаллаҳои аҳолинишин оғоз гардид

ДУШАНБЕ, 25.10.2023. /АМИТ «Ховар»/. Дар ноҳияи Варзоб ҷиҳати сазовор пешвоз гирифтани ҷашни 35-солагии Истиқлоли давлатии Ҷумҳурии Тоҷикистон чароғонкунии шоҳроҳи Душанбе-Чанок дар  ҳудуди маҳаллаҳои аҳолинишин  оғоз карда шуд.  Дар ин хусус ба АМИТ «Ховар» дар мақомоти иҷроияи ҳокимияти давлатии ноҳия хабар доданд.

Ноҳияи Варзоб ҳамқадами Истиқлоли давлатӣ буда, дар муддати кӯтоҳ дар ҳудуди он якчанд иншооти иҷтимоию иқтисодӣ, корхонаҳои саноатӣ ва инфрасохторҳои хизматрасонӣ мавриди истифодаи сокинон қарор гирифтаанд.

Имрӯзҳо дар атрофи мақомоти иҷроия, шоҳроҳи асосӣ, минтақаҳои истироҳатӣ ва боғи фарҳангӣ-фароғатии «Парчами миллӣ»-и ноҳияи Варзоб дарахтони ҳамешасабз ва гулҳои ороишӣ шинонида, амсилаҳои шакли гуногуни ҳайвонот гузошта шудаанд, ки дар он саҳми кормандони Мақомоти иҷроияи ҳокимияти давлатии ноҳияи Варзоб ва Муассисаи давлатии Раёсати ободонӣ ва сабзазоркунии ноҳия назаррас мебошад.

«Мо бояд бо фарҳанги баланд ба ин масъала таваҷҷуҳи хосса зоҳир намоем ва бо ин васила ҷалби сайёҳонро ба пойтахи азизамон- шаҳри Душанбе ва умуман ба тамоми минтақаҳои Тоҷикистон зиёд гардонем. Ҳар сокини Ватан вазифадор аст, ки атрофи хона ва маҳали истиқомати худро тозаву озода нигоҳ дорад»,-иброз доштанд дар мақомоти иҷроияи ҳокимияти давлатии ноҳия.

АКС: Мақомоти иҷроияи ҳокимияти давлатии ноҳияи Варзоб