ҶОМИ ДАСТАИ «ИСТИҚЛОЛ». Имрӯз ғолибони мусобиқа оид ба футболи хурд муайян мешаванд

ДУШАНБЕ, 20.10.2023 /АМИТ «Ховар»/. Шоми имрӯз бозии даври ниҳоии Ҷоми дастаи «Истиқлол» оид ба футболи хурд баргузор мегардад. Барои ба даст овардани мақоми аввал дар дидори ниҳоӣ дастаҳои футболи Вазорати корҳои дохилии Ҷумҳурии Тоҷикистон ва «Олуча такси» рақобат менамоянд. Дар ин хусус шореҳи варзиши АМИТ «Ховар» бо истинод ба Федератсияи футболи Тоҷикистон хабар медиҳад.

Пеш аз бозии финалӣ рақобат барои ишғоли ҷои сеюм байни дастаҳои футболи «Истиқлол»-и шаҳри Душанбе ва «Ориёнбонк»-и шаҳри Душанбе баргузор мегардад. Пас аз анҷоми дидори ниҳоӣ маросими қадрдонии ҷоизадорон ва беҳтаринҳои мусобиқа доир мешавад.

Қобили тазаккур аст, ки дар бозии даври нимниҳоӣ мизбони мусобиқа- дастаи «Истиқлол» бо ҳисоби 0 бар 3 аз дастаи Вазорати корҳои дохилии Ҷумҳурии Тоҷикистон мағлуб шуд.

Дар бозии дигар дастаи «Ориёнбонк» бо ҳисоби 1 бар 6 аз дастаи «Олуча Таксӣ» шикаст хӯрд. Дастаи футболи «Олуча Таксӣ» бори аввал дар таърихи ин мусобиқа ба финал роҳ ёфт.

Ёдовар мешавем, ки дар мусобиқаи Ҷоми дастаи «Истиқлол», ки бахшида ба 32-солагии Истиқлоли Ҷумҳурии Тоҷикистон баргузор мешавад, дастаҳои вазорату идораҳо, ташкилоту корхонаҳо иштирок намуданд.

Маблағи умумии ҷоизаҳои мусобиқа 100 ҳазор сомониро ташкил медиҳад. Дастаи ғолиб бо Ҷом, медал ва ҷоизаи пулӣ дар ҳаҷми 50 ҳазор сомонӣ сарфароз мегардад. Дастаҳое, ки барандаи медали нуқра 30 ҳазор сомонӣ ва барандаи медали биринҷӣ 20 ҳазор сомонӣ ба даст меоранд. Беҳтарин бозингарон бо ифтихорномаҳо ва туҳфаҳои қиматбаҳо сарфароз гардонида мешаванд.

АКС: Федератсияи футболи Тоҷикистон