Дар Бадахшон мусобиқаи варзишӣ барои дарёфти Ҷоми раиси вилоят ҷамъбаст гардид

ДУШАНБЕ, 17.11.2023 /АМИТ «Ховар»/. Бахшида ба Рӯзи Президенти Ҷумҳурии Тоҷикистон дар Вилояти Мухтори Кӯҳистони Бадахшон шуруъ аз 1 ноябр Мусобиқаи варзишӣ оид ба намуди волейбол барои дарёфти Ҷоми раиси вилоят дар байни калонсолон, занон ва идораву муассисаҳо баргузор шуд, ки дар он зиёда аз 40 даста бо теъдоди 400 варзишгар аз шаҳру ноҳияҳои вилоят иштирок намуданд. Дар ин хусус АМИТ «Ховар» бо истинод ба Мақомоти иҷроияи ҳокимияти давлатии вилоят хабар медиҳад.

Имрӯз, 17 ноябр дар Маҷмааи варзишии шаҳри Хоруғ мусобиқаи варзишӣ оид ба намуди волейбол ҷамъбаст гардид.

Раиси вилоят ғолибонро барои нишон додани маҳорати баланди варзишӣ табрик гуфта, иброз дошт, ки варзиш яке аз соҳаҳои афзалиятнок буда, ҳамеша зери таваҷҷуҳи Ҳукумати мамлакат қарор дорад. Мақомоти иҷроияи ҳокимияти давлатии вилоят низ варзишгаронро дастгирӣ намуда, ҷиҳати фароҳам овардани шароити муосир барои онҳо пайваста кӯшиш менамояд.

Аз рӯи натиҷаи мусобиқа дар байни калонсолон ҷойи якумро дастаи Шуғнон-1, ҷойи дуюмро дастаи Ҷамъияти дорои масъулияти маҳдуди «Бунёд» ва ҷойи сеюмро дастаи Шуғнон-2 сазовор гардиданд.

Дар байни дастаҳои занон ҷойи якумро дастаи комиссариати ҳарбии вилоят, ҷойи дуюмро Донишгоҳи давлатии Хоруғ ва ҷойи сеюмро Маркази саломатии шаҳр  соҳиб шуданд.

Байни идораву муассисаҳои вилоятӣ ҷойи якум ба дастаи Раёсати Кумитаи давлатии амнияти миллии Ҷумҳурии Тоҷикистон дар вилоят, ҷойи дуюм ба «Идораи хоҷагии роҳҳои автомобилгард»-и вилоят ва ҷойи сеюм ба дастаи Шуғнон-1 дода шуд.

Сипас, дар вазъияти тантанавӣ ба ғолибон Ҷоми раиси вилоят, ифтихорнома ва мукофоти пулӣ тақдим гардид.

АКС: Мақомоти иҷроияи ҳокимияти давлатии Вилояти Мухтори Кӯҳистони Бадахшон