Дар нуҳ моҳ дар ноҳияи Ҳамадонӣ 807 нафар ба нафақа баромаданд

ДУШАНБЕ, 12.11.2023 /АМИТ «Ховар»/. Дар нуҳ моҳи соли равон дар ноҳияи Ҳамадонӣ 807 нафар ба нафақа баромаданд. Дар ин хусус сардори Раёсати Агентии суғуртаи иҷтимоӣ ва нафақаи ноҳияи Ҳамадонӣ Ёраҳмад Гулаҳмадзода ба АМИТ «Ховар» иттилоъ дод.

Аз ҷумла, ӯ гуфт, ки аз онҳо гирандагони нафақаи пиронсолӣ – 610, маъюбӣ – 66, маъюбӣ то синни 18 – сола ва аз он боло- 37 нафар, бесаробонӣ-  81 ва  бозҳисобӣ 13 нафарро ташкил медиҳад.

-То моҳи сентябри соли 2023 дар Раёсати Агентии суғуртаи иҷтимоӣ ва нафақа дар ноҳияи Мир Сайид Алии Ҳамадонӣ 15025 нафақахӯр сабти ном шудааст, ки аз он 9135 нафарашонро занон ташкил медиҳанд. Талаботи нафақаи онҳо дар нуҳ моҳи соли равон ба 48109439 сомонӣ баробар аст. Талаботи миёнаи моҳонаи нафақахӯрон дар ноҳия 5345493 сомониро дар бар мегирад, — гуфт сардори Раёсат  Ёраҳмад Гулаҳмадзода.

Ба иттилои мавсуф, музди миёнаи нафақа дар ноҳияи Ҳамадонӣ 342 сомонӣ буда, ба нафақахӯрон аз рӯи категорияҳои гуногун нафақа тайъин гардидааст.

Ҳамчунин гуфта шуд, ки дар айни замон дар ноҳия 2969 нафар маъюбон мебошанд, ки аз онҳо 251 нафар маъюби гурӯҳи якум, 1385 нафар маъюби гурӯҳи дуюм, 756 нафар маъюби гурӯҳи сеюм мебошанд.

Тайи нуҳ моҳи соли равон аз тарафи Раёсат ба 82 оилаи камбизоати нафақахӯроне, ки фавтидаанд, ба маблағи 109 ҳазору 600 сомонӣ кумакпулӣ расонида шудааст.

АКС: АМИТ «Ховар»