Паҳлавонони тоҷик аз Чемпионати ҷаҳонии самбо бо се медали биринҷӣ ба Ватан бармегарданд

ДУШАНБЕ, 13.11.2023 /АМИТ «Ховар»/. Чемпионати ҷаҳон оид ба самбо дар шаҳри Еревани Арманистон ба анҷом расид, ки дар он паҳлавонони тоҷик соҳиби 3 медали биринҷӣ шуданд. Дар ин хусус шореҳи варзиши АМИТ «Ховар» бо истинод ба Кумитаи кор бо ҷавонон ва варзиши назди Ҳукумати Ҷумҳурии Тоҷикистон хабар медиҳад.

Акмалиддин Каримов дар вазни то 58 кг дар рӯзи якуми мусобиқа аввалин медали биринҷиро соҳиб шуд. Бобохон Мирзозодаи 25-сола дар вазни то 58 кг аз самбои размӣ дар рӯзи дуюми мусобиқа ба гирифтани медали биринҷии дуюм даст ёфт. Дар рӯзи охири чемпионати ҷаҳон Худоёр Раҷабзода дар вазни то 71 кг аз самбои размӣ ба гирифтани медали биринҷии сеюм ноил гардид.

Тоҷикистонро дар ин мусобиқаи сатҳи баланд Акмалиддин Каримов дар вазни то 58кг, Хушқадам Хусравов дар вазни то 64кг, Деваштич Убайдӣ дар вазни то 79кг, Зафар Олимшоев дар вазни то 88кг, Бахтовар Замиров дар вазни то 98 ва дар самбои размӣ Бобохон Мирзозода дар вазни то 58кг, Сорбон Латипов дар вазни то 64кг, Худоёр Раҷабзода дар вазни то 71кг ва Сарвар Ҳотамбекзода дар вазни то 88кг, муаррифӣ намуданд.

Ёдовар мешавем, ки аз 10 то 12 ноябр шаҳри Еревани Арманистон мизбони Чемпионати ҷаҳон оид ба самбо шуд, ки барои иштирок дар ин мусобиқаи муҳими сол варзишгарон аз 65 давлат дархост доданд. Тибқи қарори Федератсияи байналмилалии самбо, варзишгарони Беларус, Русия, Фаронса ва паноҳандагон дар ҳайати тими бетараф сабқат намуданд.

Ба ғолибону ҷоизадорони мусобиқот дар рақобатҳои инфиродӣ ба ғайр аз медал инчунин ҷоизаҳои молӣ- барои ҷойи аввал 4000 доллари ИМА, ҷойи дуюм – 3000 доллар ва барои ҷойҳои сеюм 2000-долларӣ тақдим шуд.

Дар солҳои соҳибистиқлолии Тоҷикистон се паҳлавони шинохтаи тоҷик унвони чемпиони ҷаҳон оид ба самборо ба даст оварданд, ки инҳо Беҳрӯз Хоҷазода (соли 2017), Хушқадам Хусравов (соли 2018) ва Акмалиддин Каримов (соли 2021) мебошанд.

АКС аз манбаъҳои боз