Дар Вазорати энергетика ва захираҳои оби Тоҷикистон ҷаласаи тантанавӣ доир гардид

ДУШАНБЕ, 22.12.2023 /АМИТ «Ховар»/. Имрӯз дар Вазорати энергетика ва захираҳои оби Ҷумҳурии Тоҷикистон бахшида ба Рӯзи энергетикҳо  ҷаласаи тантанавӣ баргузор гардид, ки дар он роҳбарият, кормандони дастгоҳи марказӣ ва ниҳодҳои зертобеъ ва дигар меҳмонону собиқадорони соҳа  иштирок намуданд. Дар ин хусус ба АМИТ «Ховар» дар Вазорати энергетика ва захираҳои оби ҷумҳурӣ иттилоъ доданд.

Иброз гардид, ки Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон маҳз бо мақсади таъмини рушди босуботи ҷумҳурӣ ва мунтазам баланд бардоштани сатҳу сифати зиндагии сокинон соҳаи энергетикаро самти афзалиятноки сиёсати давлат ва ноил гардидан ба истиқлолияти комили энергетикиро аз ҳадафҳои муҳиму стратегии миллӣ эълон намудаанд.

Таъкид шуд, ки бо мақсади пурра амалӣ гардидани ин ҳадаф кормандони соҳаи энергетика, аз ҷумла кормандони вазорат ва ниҳодҳои зертобеи он дастуру ҳидоятҳои Сарвари давлатро сармашқи фаъолият қарор дода, барои ҳалли мушкилоти соҳаи энергетика саъю талош намуда, ба дастовардҳои назаррас ноил гардидаанд.

Ҳадафи энергетикҳо боз ҳам бештар аз худ намудани захираҳои гидроэнергетикӣ, афзоиши истеҳсоли неруи барқ ва таъмини эҳтиёҷоти соҳаҳои гуногуни иқтисод ва сокинони ҷумҳурӣ бо неруи барқи доимӣ мебошад.

Дар ҷаласаи тантанавӣ як зумра кормандони фаъол барои меҳнати софдилона ва хизматҳои шоёнашон дар соҳаи энергетика бо Ифтихорнома ва медали «Аълочии энергетика» сарфароз гардонида шуданд.

АКС: Вазорати  энергетика ва захираҳои оби Ҷумҳурии Тоҷикистон