Клуби «Ҳоҷӣ Шариф» барандаи медали нуқраи «Jenys Cup 2023» гардид

ДУШАНБЕ, 22.12.2023. /АМИТ «Ховар»/. Клуби ҷудои «Ҳоҷӣ Шариф» дар аввалин мусобиқаи байналмилалӣ байни клубҳо «Jenys Cup 2023» сазовори ҷои дуюм гардид, иттилоъ медиҳад АМИТ «Ховар» бо истинод ба Федератсияи ҷудои Тоҷикистон.

Мусобиқа байни мардон 21 декабр дар шаҳри Алмаатои Қазоқистон баргузор шуда, рақобатҳо дар вазнҳои -66кг, -73кг, -81кг, -90кг ва +90кг доир шуда, дар он 17 клуб аз Тоҷикистон, Қазоқистон, Узбекистон, Қирғизистон, Гурҷистон, Русия, Беларус, Туркия, Испания, Муғулистон ва Фаронса иштирок намуданд.

Клуби «Ҳоҷӣ Шариф» дар финал аз клуби «Шеварденӣ»-и Гурҷистон мағлуб шуд. Ду ҷои сеюмро дастаҳои «Эделвейс» (Русия) ва «Женус» (Қазоқистон) гирифтанд.

Ба ҳайати клуби «Ҳоҷӣ Шариф» Муллораҷаб Халифаев (-66кг), Абубакр Шеров, Муҳаммадшариф Наҷмиддинов (-73кг), Қурбон Кудиев (-81кг), Умедҷон Раҷабов (-90кг) ва Мансур Раҳмон (+90кг) шомил буданд.

Фонди ҷоизавии мусобиқа 100 ҳазор доллари амрикоиро ташкил дода, ба ғолиб 30 ҳазор доллари ИМА, ҷои 2-юм – 20 ҳазор ва ду ҷойи сеюм 10 ҳазор доллар тақдим шуд. Инчунин беҳтарин ҷудочӣ, беҳтарин техника ва гаронарзиштарин иштирокчӣ муайян ва бо ҷоизаҳои пулӣ қадрдонӣ гардиданд.

АКС: Федератсияи ҷудои Тоҷикистон