ЛИГАИ ЧЕМПИОНҲОИ ОСИЁ. Бозии дастаҳои футболи «Истиқлол» ва «Ал-Наср» мусовӣ анҷом ёфт

ДУШАНБЕ, 06.12.2023. /АМИТ «Ховар»/. Шаби 5 декабр дар Варзишгоҳи марказии ҷумҳуриявии шаҳри Душанбе бозии даври ниҳоии марҳилаи гурӯҳии Лигаи чемпионҳои Осиё -2023/24 дар чаҳоргонаи «Е» байни дастаҳои футболи «Истиқлол» -и Тоҷикистон ва «Ал-Наср» -и Арабистони Саудӣ дар сатҳи балнд баргузор гардид. Вохӯрии дастаҳо бо иштироки 17 750 нафар мухлис хеле ҷолиб доир гардида, бо натиҷаи мусовии 1:1 ба анҷом расид. Дар ин хусус шореҳи варзиши АМИТ «Ховар» хабар медиҳад.

Бозигари дастаи футболи «Истиқлол» -и Тоҷикистон Алишер Ҷалилов дар дақиқаи 32-юм бо задани гол ҳисобро дар вохӯрӣ кушод. Абдулраҳмон Ғариб дар дақиқаи 50-ум аз ҳайати дастаи футболи «Ал-Наср» -и Арабистони Саудӣ гол зада, ҳисобро баробар намуд. Пас аз ин бозӣ Алишер Ҷалилов аз ҳайати дастаи футболи «Истиқлол» -и Тоҷикистон беҳтарин бозингари ин вохӯрӣ эътироф гардид.

Дар бозии дигари гурӯҳ дастаи футболи «Персеполис»-и Эрон аз дастаи «Ал-Дуҳайл»-и Қатар бо ҳисоби 1:2 шикаст хӯрда, имкони аз гурӯҳ ба даври баъдӣ баромаданро аз даст дод.

Ёдовар мешавем, ки дар ҷадвали гурӯҳи «Е» дастаи футболи «Ал-Наср»-и Арабистони Саудӣ бо 14 имтиёз дар мақоми аввал буда, роҳхати даври плей-оффро соҳиб шудааст. Дастаи «Персеполис»-и Эрон бо 8 имтиёз дар зинаи дуюм қарор дорад. Дастаи футболи «Ал-Дуҳайл»-и Қатар бо 7 имтиёз дар зинаи сеюм ва дастаи футболи «Истиқлол» -и Тоҷикистон бо се имтиёз дар зинаи охир ҷойгир аст.

Ҳамин тавр, дар ин гурӯҳ дастаи футболи «Ал-Наср» -и Арабистони Саудӣ ба даври даври плей-офф роҳ ёфт. Мусобиқа барои дастаҳои футболи «Персеполис»-и Эрон, «Истиқлол»-и Тоҷикистон ва «Ал-Дуҳайл»-и Қатар анҷом ёфт.

АКС: Федератсияи футболи Тоҷикистон