Сарвари давлат: «Имрӯз мо шоҳиди уҳдадории дастаҷамъонаи бонкҳои байналмилалии рушд ҷиҳати суръатбахшӣ ба маблағгузории соҳаи обу иқлим гаштем»

ДУШАНБЕ, 04.11.2023. /АМИТ «Ховар»/. Бо истифода аз фурсат, омодагии Тоҷикистонро ҷиҳати минбаъд ҳам пеш бурдани масъалаҳои обу иқлим дар рӯзномаи ҷаҳонии рушд иброз медорам. Итминон дорам, ки талошҳои дастаҷамъонаи мо дар ин раванд самараи дилхоҳ хоҳанд дод. Ин матлабро Президенти Ҷумҳурии Тоҷикистон муҳтарам Эмомалӣ Раҳмон зимни суханронӣ дар Мизи мудаввари сатҳи баланди Саммити ҷаҳонӣ оид ба амалҳои иқлимӣ, ки 2 декабри соли равон дар Аморати Муттаҳидаи Араб баргузор шуд, баён намуданд.

«Моҳи марти соли равон Тоҷикистон дар якҷоягӣ бо Нидерланд Конфронси таърихии оби Созмони Милалро мизбонӣ намуд. Дар ин ҳамоиш Рӯзномаи амал қабул гардид. Он зиёда аз 800 амалу уҳдадориҳоро дар соҳаи об дарбар мегирад. Шумораи зиёди онҳо бо иқлим низ алоқамандии зич доранд. Мусаллам аст, ки хатару таҳдидҳои обу иқлим талошу амалҳои ҷиддитарро талаб менамояд», -тазаккур доданд Сарвари давлат.

Пешвои миллат дар ин робита, се нуктаи муҳимро баён намуданд.

«Якум, дарки амиқи масъала ва пешбурди самараноки он пеш аз ҳама иродаи сиёсӣ ва таваҷҷуҳи муштараки сарони давлатҳову ҳукуматҳоро талаб менамояд. Ҳамкории Тоҷикистону Нидерланд ҳамчун кишварҳои болообу поёноб гувоҳи возеҳи ҳамкории созанда дар ин самт мебошанд. Дуюм, имрӯз мо шоҳиди уҳдадории дастаҷамъонаи бонкҳои байналмилалии рушд ҷиҳати суръатбахшӣ ба маблағгузории соҳаи обу иқлим гаштем. Сипоси хешро ба онҳо барои саҳми муассирашон дар ин ҷода иброз менамоем.Ҳамзамон, зарур мешуморем, ки дигар ҷонибҳо низ талошҳои худро дар ин самт фаъол намоянд.Сеюм, мо бояд таҳия ва татбиқи механизмҳои муштараки расонидани кумакҳоро ба кишварҳои осебпазир таъмин намоем.Зеро онҳо барои расидан ба ҳадафҳои марбут ба об имкониятҳои маҳдуд доранд», — иброз доштанд Президенти Ҷумҳурии Тоҷикистон.

Акс: Хадамоти матбуоти Президенти Ҷумҳурии Тоҷикистон.