Қазоқистон ба Тоҷикистон таҷҳизоти муосири тиббӣ дастрас намуд

ДУШАНБЕ, 17.01.2024. /АМИТ «Ховар»/. Дар шаҳри Душанбе маросими тақдими се таҷҳизоти муосири тиббии BARK VibroLUNG доир гардид. Дар ин хусус ба АМИТ «Ховар» дар маркази матбуоти Вазорати тандурустӣ ва ҳифзи иҷтимоии аҳолии Ҷумҳурии Тоҷикистон хабар доданд.

Ҷиҳати истифодаи дурусти таҷҳизоти ба Ҷумҳурии Тоҷикистон аз ҷониби Қазоқистон расида 40 мутахассиси соҳа, аз ҷумла пулмонологҳои мамлакат ба машғулияти омӯзишӣ фаро гирифта шуданд.

Зимни машварати омӯзишӣ аз ҷониби мутахассисони Қазоқистон ба табибони мамлакат тарзу усули истифодаи таҷҳизоти BARK VibroLUNG омӯзонида шуд.

Дастгоҳи виброакустикии BARK VibroLUNG барои табобати бемориҳои шуш ва мушкилоти шуш дар муассисаҳои табобатӣ пешбинӣ шудааст. Раванди кори дастгоҳ ба таъсири сигнали пурқуввати виброакустикӣ асос ёфта, он метавонад ба муддати 10 сол хизмат расонад.

АКС: Маркази матбуоти Вазорати тандурустӣ ва ҳифзи иҷтимоии аҳолии Ҷумҳурии Тоҷикистон