Иҷрои нишондиҳандаҳои асосии Паёми Президенти Тоҷикистон ба Маҷлиси Олӣ дар идораҳои минтақавии корхонаи «Роҳи оҳани Тоҷикистон» давоми соли 2024 таъмин карда мешавад

ДУШАНБЕ, 30.01.2024 /АМИТ «Ховар»/. Паёми Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон «Дар бораи самтҳои асосии сиёсати дохилӣ ва хориҷии ҷумҳурӣ», барои таъмини  рушди устувори иқтисодию иҷтимоӣ дар мамлакат  замина фароҳам меоварад.  Ин нукта дар ҳамоишҳое, ки дар идораҳои минтақавии Корхонаи воҳиди давлатии «Роҳи оҳани Тоҷикистон»  дар вилояти Суғд ва Хатлон баргузор гардид, таъкид шуд.

АМИТ «Ховар» бо истинод ба Корхонаи воҳиди давлатии «Роҳи оҳани Тоҷикистон» иттилоъ медиҳад, ки дар ҳамоиш роҳбарият ва коргарону мутахассисони идораҳои дар вилоятҳои Суғд ва Хатлонбудаи «Роҳи оҳани Тоҷикистон» доир ба паҳлуҳои муҳими Паёми Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон  ибрози назар намуданд.

Гуфта шуд, ки Президенти Тоҷикистон муҳтарам Эмомалӣ Раҳмон дар Паём ба Маҷлиси Олӣ дар радифи арзёбии дигар соҳаҳои муҳими иқтисодиёти мамлакат ба соҳаи роҳу нақлиёт, хусусан роҳи оҳан таваҷҷуҳ зоҳир намуда, таъкид доштанд, ки «дар даврони соҳибистиқлолӣ дар мамлакат 58 лоиҳаи сармоягузории давлатӣ дар самти сохтмону таҷдиди роҳҳои мошингард ва роҳи оҳан, бунёди инфрасохтори онҳо ва таҳкими иқтидори техникии соҳа ба маблағи 26,6 миллиард сомонӣ амалӣ гардида, ҳоло корҳо дар ин самт бомаром идома доранд».

Бояд тазаккур дод, ки дар солҳои Истиқлоли давлатии Ҷумҳурии  Тоҷикистон Ҳукумати мамлакат ба рушди соҳаҳои афзаиятноки  иқтисоди мамлакат, аз ҷумла роҳу нақлиёт, роҳи оҳан  таваҷҷуҳи хосса зоҳир намуда, дар мамлакат иншооти муҳим дар соҳаи роҳдорӣ, ки барои  мамлакат ва минтақа дорои аҳамияти стратегӣ мебошанд, бунёд ва ба истифода дода шуданд.  Ҳамзамон баромадан аз бунбасти коммуникатсионӣ яке аз чор ҳадафи стратегии Ҳукумати  Ҷумҳурии  Тоҷикистон маҳсуб мешавад.

Иштирокдорони ҳамоиш бо баррасии паҳлуҳои гуногуни Паёми Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олӣ таъкид намуданд, ки нуктаҳои Паёми Президенти мамлакат муҳтарам Эмомалӣ Раҳмонро   ҳамчун дастури рӯйимизӣ дар фаъолияташон истифода менамоянд.

АКС: Корхонаи воҳиди давлатии «Роҳи оҳани Тоҷикистон»