Имрӯз таҳти раёсати Сарвазири Тоҷикистон Қоҳир Расулзода ҷаласаи нахустини Кумитаи тадорокути конференсияи сеюми байналмилалии сатҳи баланд оид ба об баргузор гардид

ДУШАНБЕ, 02.01.2024 /АМИТ «Ховар»/. Имрӯз таҳти раёсати Сарвазири мамлакат Қоҳир Расулзода ҷаласаи нахустини Кумитаи тадорокути Конференсияи сеюми байналмилалии сатҳи баланд оид ба Даҳсолаи байналмилалии амал «Об барои рушди устувор, солҳои 2018-2028» баргузор гардид, хабар медиҳад АМИТ «Ховар».

Дар кори ҷаласа аъзои Кумитаи тадорукот ва роҳбарони вазорату идораҳои дахлдори мамлакат иштирок намуда, оид ба ҷараёни омодагӣ ва корҳои ташкилӣ вобаста ба баргузории ин чорабинии сатҳи баланди байналмилалӣ, ки дар доираи ташаббусҳои ҷаҳонии Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар масъалаи об ва иқлим доир мегардад, ҳисобот доданд.

Таъкид шуд, ки Конференсияи сеюми байналмилалии сатҳи баланд оид ба Даҳсолаи байналмилалии амал «Об барои рушди устувор, солҳои 2018-2028» моҳи июни соли равон дар пойтахти мамлакат — шаҳри Душанбе доир гардида, дар кори он иштироки роҳбарони давлатҳо ва ҳукуматҳои якчанд мамлакатҳои ҷаҳон ва ташкилоту созмонҳои минтақавию байналмилалӣ пешбинӣ шудааст.

Тибқи барнома, дар ҳошияи Конференсияи сатҳи баланди байналмилалӣ баргузории муколамаҳои муштарак, форум ва ҷаласаҳои алоҳида доир ба масъалаҳои об ва иқлим дар нақша аст.

Сарвазири мамлакат Қоҳир Расулзода ҷиҳати омодагии сатҳи баланд ва вусъати корҳои ташкилию ташрифотӣ ба ин чорабинии сатҳи баланд аъзои Кумитаи тадорукот ва  роҳбарони вазорату идораҳои мамлакатро вазифадор намуд.