Юрий Сёмин: «Ҳидоятҳои Президенти Тоҷикистон Эмомалӣ Раҳмон дар лаҳзаи муҳим бозингаронро руҳбаланд намуд, ба онҳо неруву талоши бештар бахшид»

Январь 29, 2024 15:33

ДУШАНБЕ, 29.01.2024 /АМИТ «Ховар»/. Тавре АМИТ «Ховар» иттилоъ дод, ба даври ҳаштякниҳоӣ ва акнун ба даври навбатии чорякниҳоӣ роҳ ёфтани дастаи мунтахаби футболи Тоҷикистон сабаби таваҷҷуҳи ҷиддии коршиносони касбӣ, мутахассисони соҳа, журналистони расонаҳои варзишии минтақаву ҷаҳон, мураббиёни сатҳи гуногун нисбат ба футболи тоҷик ва бозигарони он гардид.

Собиқ мураббии дастаи мунтахаби футболи Русия, сармураббии дастаҳои футболи «Помир»-и Душанбе ва «Локомотив»-и шаҳри Москва Юрий Сёмин дар робита ба бозии дастаи мунтахаби Тоҷикистон оид ба футбол дар Ҷоми Осиё-2023 андешаҳои худро ба нашрияи «Фарғона» изҳор намуда, таъкид доштааст, ки «бозиҳои нахустини дастаи мунтахаби Тоҷикистон дар Ҷоми Осиё муваффақияти бузург аст. Дар гурӯҳ аз дастаи мунтахаби Чин болотар ҷой гирифтан кори саҳл нест. Дар айни замон дастаи мунтахаби Тоҷикистон вазифаи аввалини худ — нишон додани бозии сазоворро аллакай иҷро намуд. Бозингарон бо муҳити паҳновари мусобиқоти бузурги минтақавӣ шинос шуданд, онро аз худ намуданд ва таҷрибаи хуб гирифтанд».

Мураббии хизматнишондодаи Тоҷикистон Юрий Сёмин дар идомаи мусоҳиба бо сомонаи   «Фарғона» гуфт, ки новобаста аз он ки дастаи футболи Тоҷикистон дар ин мусобиқа кадом ҷойро сазовор мегардад, бисёр мехостам, ки ин муваффақият охирин набошад: «Бояд ба рушди футболи кӯдакону наврасон ва ҷавонон таваҷҷуҳи беш аз пеш дода шавад».

Юрий Сёмин бо баҳогузорӣ ба фаъолияти сармураббии дастаи мунтахаби футболи Тоҷикстон Петр Сегрт чунин гуфтааст: «Вазифаи мураббии дастаи мунтахаб ҷамъ овардани беҳтаринҳо дар даста мебошад. Ӯ бояд таконбахш ва равоншинос бошад. Бояд гуфт, ки Сегрт бо бозингарон хеле хуб кор бурд. Дар ҳар бозӣ метавон дид, ки чӣ тавр  бозингарон бо тамоми нерӯ ва ҷидду ҷаҳди бепоён бозӣ менамоянд.  Дар баробари ҳамин хизмати мураббиҳои дастаҳои футболи мамлакат низ кам нест. Аз ҷумла фаъолияти Игор Черевченко, ки  сармураббии дастаи «Истиқлол» буд».

Юрий Сёмин таъкид намудааст, ки омили дигаре, ки ба бозингарон таъсири нек медиҳад, ин дастгирии Ҳукумати мамлакат ва шахсан Президенти Ҷумҳурии Тоҷикистон муҳтарам Эмомалӣ Раҳмон мебошад.

«Ҳидоятҳои Президенти Тоҷикистон Эмомалӣ Раҳмон дар лаҳзаи муҳим — қабл аз бозӣ бо дастаи Лубнон бозингаронро руҳбаланд намуд, ба онҳо неруву талоши бештар бахшид. Ин низ кори кам нест», — гуфтааст Сёмин.

Хотирнишон месозем, ки дар бозии ҳаштякниҳоии Ҷоми Осиё-2023 оид ба футбол дастаи мунтахаби Тоҷикистон тими Амороти Муттаҳидаи Арабиро мағлуб намуда, ба даври чорякниҳоӣ баромад. Дар вақти асосӣ бозӣ бо ҳисоби 1:1 хотима ёфт. Дар 30 дақиқаи вақти изофӣ ҳисоб тағйир наёфт. Дар задани силсилаи зарбаҳои 11-метра бозингарони тоҷик маҳорати баланд нишон дода, бо ҳисоби 5:3 ғолиб омаданд.

Баромадани дастаи мунтахаби футболи Тоҷикистон аз марҳалаи гурӯҳӣ ба марҳалаи чорякниҳоӣ дастоварди бузурги футболи тоҷик дар замони истиқлоли давлатӣ мебошад.

Мураббии хизматнишондодаи Тоҷикистон, собиқ сармураббии дастаи овозадори «Помир»-и Душанбе Юрий Сёмин дар доираҳои варзишгарони Тоҷикистон ва байни мухлисони футболи тоҷик обрӯву эътибори хосса дорад.

АКС: АМИТ «Ховар»

Январь 29, 2024 15:33

Хабарҳои дигари ин бахш

Аъзои дастаи мунтахаби наврасони Тоҷикистон (U-17) бар ҳамсолонашон аз Фиҷи пирӯз шуданд
«KING’S CUP 2026». Имрӯз дастаи мунтахаби Тоҷикистон дар даври нимниҳоии мусобиқа бо тими яккачини Умон бозӣ мекунад
Дастаи мунтахаби Тоҷикистон оид ба футзал бозии дӯстонаи дуюмро бо Узбекистон мусовӣ анҷом дод
Дастаи мунтахаби ҷавонони Тоҷикистон (U-20) дар оғози Мусобиқаи «Рanda Сup-2026» бо Кореяи Ҷанубӣ ҳисоби бозиро мусовӣ кард
Дастаи мунтахаби Тоҷикистон омодагӣ ба мусобиқаи «Кing’s Сup 2026»-ро оғоз кард
Паҳлавонони тоҷик аз Чемпионати ҷаҳон оид ба самбо бо шаш медали ифтихорӣ бармегарданд
Дастаи мунтахаби наврасони Тоҷикистон (U-17) бо дастаи Кот-д’Ивуар мусовӣ бозӣ намуд
Президенти Кумитаи миллии паралимпии Тоҷикистон дар ҷаласаи Кумитаи байналмилалии паралимпӣ иштирок намуд
Дастаи мунтахаби футзали Тоҷикистон бозии дӯстонаи якумро бо дастаи Узбекистон анҷом дод
Ҷоми Осиё-2027 оид ба футбол аз моҳи декабри соли 2027 то январи 2028 доир мешавад
Ҳайати дастаи мунтахаби Тоҷикистон барои иштирок дар Мусобиқаи «Кing’s Сup-2026» муайян шуд
Дастаи мунтахаби наврасони Тоҷикистон дар Дубай се бозии дӯстона анҷом медиҳад