Дар деҳаи Чорбоғи Ҷамоати деҳоти Косатароши шаҳри Панҷакент пули мошингузар сохта шуд

ДУШАНБЕ, 04.02.2024 /АМИТ «Ховар»/. Дар деҳаи Чорбоғи Ҷамоати деҳоти Косатароши шаҳри Панҷакент пули мошингузар сохта шуд.

Тавре АМИТ «Ховар» бо истинод ба Мақомоти иҷроияи ҳокимияти давлатии шаҳри Панҷакент хабар медиҳад, ин пул бо саҳми сокинони деҳа ба тариқи ҳашар бунёд гардидааст.

Сокинони деҳаи Чорбоғи Ҷамоати деҳоти Косатарош пайваста барои ободу зебо намудани маҳалли зисти худ, аз ҷумла бунёди мактаб, роҳу пул, муассисаҳои тиббӣ талош менамоянд. Чанд сол қабл бо мусоидати мақомоти иҷроияи маҳаллии ҳокимияти давлатии шаҳр онҳо барои бунёди синфхонаҳои иловагӣ дар назди муассисаи таълимии деҳа саҳм гузоштанд. Ҳоло корҳои ороишӣ дар бинои дуқабатаи беморхонаи минтақавӣ, ки онро ҳам  сокинон бо роҳи ҳашар бунёд намуданд, идома дорад.

Бояд гуфт, ки Президенти Ҷумҳурии Тоҷикистон муҳтарам Эмомалӣ Раҳмон дар Паём ба Маҷлиси Олии мамлакат «Дар бораи самтҳои асосии сиёсати дохилӣ ва хориҷии ҷумҳурӣ» ба ташаббусҳои созандаи сокинони ҷумҳурӣ барои ободии диёр баҳои баланд додаанд.

АКС: Мақомоти иҷроияи ҳокимияти давлатии шаҳри Панҷакент