ДАРАХТ БИНШОН! Дар Мамнуъгоҳи биосферии «Ромит» беш аз 1000 бех ниҳоли дарахтони мева ва ороишӣ шинонида шуд

ДУШАНБЕ, 10.02.2023 /АМИТ «Ховар»/. Бо иқдоми Кумитаи ҳифзи муҳити зисти назди Ҳукумати Ҷумҳурии Тоҷикистон дар доираи маъракаи ниҳолшинонӣ дар экосистемаҳои Мамнуъгоҳи  биосферии «Ромит»  беш аз 1000 бех ниҳоли дарахтони мева ва сояафкану ороишӣ шинонида шуд. Дар ин хусус  АМИТ «Ховар» бо истинод ба Кумитаи ҳифзи муҳити зисти назди Ҳукумати Ҷумҳурии Тоҷикистон иттилоъ медиҳад.

Ин иқдом  дар асоси дастуру супоришҳои  Президенти Ҷумҳурии Тоҷикистон муҳтарам Эмомалӣ Раҳмон дар доираи маъракаи ниҳолшинонию сабзазоркунӣ дар ҳудуди шаҳру ноҳияҳои ҷумҳурӣ  амалӣ гардид.

Бояд тазаккур дод, ки ҳифзу нигоҳдории ҳудудҳои табиии махсус муҳофизатшаванда, бахусус ҳолати табиии экосистемаҳои хос, муҳити сукунати олами ҳайвоноти нодир ва пешгирии таназзули   экосистемаҳои табиӣ яке аз самтҳои афзалиятноки фаъолияти мақомоти ҳифзи муҳити зист мебошад.

Кормандони Муассисаи давлатии «Ҳудудҳои табиии махсус муҳофизатшаванда»-и Кумитаи ҳифзи муҳити зисти нази Ҳукумати ҷумҳурӣ, мақомоти ҳифзи муҳити зист дар шаҳри Ваҳдат ва сокинони маҳал дар маъракаи ниҳолшинонӣ фаъолона иштирок намуда, дар беҳдошти муҳити зисти ин гӯшаи табиати зебои ҷумҳурӣ саҳм гузоштанд.

Ниҳолҳои дарахтони мева ва сояафкану ороишии навъҳои санавбар, айлан, туйка ва олучаи даштӣ хоси иқлими экосистемаи Мамнуъгоҳи биосферии Ромит  буда, бо риояи талаботи агротехникӣ шинонида шуданд.

Дар доираи маъракаи ниҳолшинонӣ Раиси Кумитаи ҳифзи муҳити зисти назди Ҳукумати Ҷумҳурии Тоҷикистон ва Раиси шаҳри Ваҳдат дар ҳудуди Мамнуъгоҳи биосферии «Ромит» ба парваришгоҳи кабк рафта, ба масъулини соҳа барои мунтазам амалӣ намудани чорабиниҳои биотехникӣ ва ба ин васила аз талафот эмин нигоҳ доштани олами ҳайвоноту парандагони нодир дар давраи сардии зимистон дастурҳои мушаххас доданд.

 АКС: Кумитаи ҳифзи муҳити зисти назди Ҳукумати Ҷумҳурии Тоҷикистон