ФУТБОЛ. Шаҳром Самиев фаъолияташро дар дастаи «Андиҷон»-и Узбекистон идома медиҳад

ДУШАНБЕ, 26.02.2024 /АМИТ «Ховар»/. Ҳамлагари дастаҳои мунтахаб  ва олимпии Тоҷикистон (U-23) оид ба футбол Шаҳром Самиев фаъолияташро дар тими «Андиҷон», ки ба Суперлигаи Узбекистон дохил аст, идома медиҳад, хабар медиҳад АМИТ «Ховар» бо истинод ба Федератсияи футболи Тоҷикистон.

Шаҳром Самиев бо дастаи «Андиҷон» шартномаи сесола баст. Қаблан Самиев дар дастаҳои «Барқчӣ», «Помир», «Истиқлол» (ҳама аз Душанбе), «Рубин» (Русия), «Шериф», «Динамо-Авто», «Зимбру» (ҳама аз Молдова), «Торпедо-Жодино», «Ислоч» (ҳарду аз Беларус) ҳунарнамоӣ намудааст. Охирин бошгоҳи Самиев «Милсами»-и Молдова мебошад.

Шаҳром Самиев аз соли 2019 дар дастаи миллии Тоҷикистон бозӣ мекунад. Дар ин муддат ӯ дар ҳайати дастаи мунтахаби мамлакат 27 бозӣ карда, муаллифи 7 гол гардидааст. Дар Ҷоми Осиё-2023 Самиев дар ҳайати дастаи миллии Тоҷикистон дар панҷ бозӣ иштирок кард.

АКС: Федератсияи футболи Тоҷикистон