«ХАТТИ ТАЙЁР». Дар вилояти Суғд техникаҳои кишоварзӣ ба мавсим омода карда мешаванд

ДУШАНБЕ, 28.02.2024 /АМИТ «Ховар»/.  Дар ноҳияҳои Бобоҷон Ғафуров ва Спитамени вилояти Суғд маъракаи қабули техникаҳои кишоварзии «Хатти тайёр» баргузор гардид. Дар ин хусус АМИТ «Ховар» бо истинод ба маркази матбуот ва иттилооти Вазорати кишоварзии Ҷумҳурии Тоҷикистон хабар медиҳад.

Дар маърака роҳбарияти Вазорати кишоварзӣ, вилояти Суғд, масъулини Мақомоти иҷроияи ҳокимияти давлатии ноҳияҳои Бобоҷон Ғафуров,  Спитамен ва дигар шахсони масъули соҳа иштирок намуданд.

Бояд гуфт, ки дар ноҳияҳои Бобоҷон Ғафуров ва Спитамен 1272 трактор ва қариб 3000 мошинолоти гуногун мавҷуд буда, 90 дар сади онҳо омодаи кор мебошанд. Инчунин дар ин ноҳияҳо 15 маркази хизматрасонии техникӣ ва зиёда аз 50 нуқтаи маслиҳатдиҳиву машваратӣ фаъолият доранд.

Зимни мулоқот аз ҷониби роҳбарияти Вазорати кишоварзии Тоҷикистон ба масъулин ҷиҳати иҷрои дастуру супоришҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон оид ба истифодаи самараноки замин, баланд бардоштани ҳосилнокӣ ва омодагии пурраи техникаву мошинолот маслиҳатҳои муфид дода шуд.

АКС: Маркази матбуот ва иттилооти Вазорати кишоварзии Ҷумҳурии Тоҷикистон