МАСЛИҲАТИ МУТАХАССИС. Нафароне, ки аз диабети қанд ва бехобӣ азият мекашанд, истеъмоли бодом барояшон фоида дорад

Февраль 11, 2024 08:59

ДУШАНБЕ, 11.02.2024 /АМИТ «Ховар»/. Бодом бутта ва ё дарахти на он қадар бузург буда, қариб 50 намуди он дар ҷаҳон маълум аст. Меваи бодом бинобар таркиби табиияш хеле фоидаовар буда, манбаи калсий, оҳан, магний, фосфор ва калий мебошад. Нафароне, ки аз диабети қанд, бехобӣ ва бемории дилу рагҳо азият мекашанд, истеъмоли бодом метавонад ба саломатии онҳо таъсири мусбат расонад. Ҳамзамон хурдани бодом раванди пиршавиро пешгирӣ менамояд.

Ба гуфтаи мутахассисон, бодом дорои бисёр витаминҳои В, B1, B2, B3, B5, B6, B9, витамини E буда, барои дил ва рагҳои хун муфид аст. Зеро дар таркиби онҳо равғанҳои серғизо, аминокислотаҳо ва минералҳои зиёде мавҷуд ҳастанд.

Бодом дорои 96 фоиз марган (RSP) мебошад, ки ин микроэлемент сатҳи қанди хунро танзим намуда, ба истеҳсоли инсулин мусоидат менамояд. Табибон барои беҳтар шудани кори дил, пешгирии  пиршавӣ ва муҳофизат аз диабети қанд дар як рӯз хӯрдани 5-6 дона бодомро кифоя меҳисобанд.

Нафароне, ки ба ҳар гуна маҳсулот ҳассосият ва вазни зиёдатӣ доранд, бояд дар вақти хӯрдани бодом ба зиёдаравӣ роҳ надиҳанд.

Духтурон хӯрдани бодомро барои нигоҳ доштани системаи асаб ва фаъолияти муътадили мағзи сар муфид дониста, тавсия медиҳанд, ки дар як рӯз дар ҳаҷми 10-15 дона бояд бодомро истеъмол намуд. Нафароне, ки синнашон аз 50 боло мебошад, мебояд бодомро барои бардамӣ ва пешгирии бемории Алтсгеймер истифода баранд. Антиоксидантҳои растанӣ, ки дар бодом мавҷуд ҳастанд, хобро ба эътидол меоранд ва бехобии вобаста ба синн ва асабонияти мавсимиро рафъ месозанд.

Кислотаҳои равғани бодом баданро аз ворид шудани глюкозаи аз ҳад зиёд ба хун муҳофизат менамоянд. Аз ин рӯ, бодом барои одамони гирифтори диабет муфид аст. Он инчунин ба масунияти организм таъсири судманд мерасонад.

Мутахассисони соҳаи тиб тавсия медиҳанд, ки бодомро аз 3-солагӣ барои хӯрдан ба кӯдакон додан мумкин аст. Флавоноидҳо дар мағзи бодом буда, ҷисми хурдро мустаҳкам намуда, иммунитетро баланд мебардоранд. Хусусияти судманди бодом, ки махсусан барои саломатии кӯдакон муҳим аст, ин пешгирии камхунӣ ва беҳтар шудани биноӣ мебошад.

Набояд бодомро аз ҳад зиёд истеъмол намуд, зеро бодом калориянокии зиёд дорад ва метавонад боиси фарбеҳии зиёдатӣ гардад. Дар натиҷа пайдо шудани вазни иловагӣ эҳтимол дорад.

Бодом аз микроэлементҳои гуногуни фоиданок, аз ҷумла калсий, магний, калий ва фосфор бой аст.  Онро ҳамчун доруи сулфа истифода бурдан мумкин аст. Аз сабаби миқдори зиёди антиоксидантҳо он метавонад ҳамчун давои хуби зидди пиршавӣ дар организм хизмат намояд.

Дар тибби муосир равғани бодом ба сифати давои рафъи қабзият тавсия дода мешавад. Онро ба таркиби линиментҳо, марҳамҳо, кремҳои гуногун илова менамоянд. Ҷавҳари обии мағзи бодом тарашшуҳи шираи меъдаро кам сохта, барои муолиҷаи газаку захми меъда ва рӯдаи дувоздаҳангушта муфид аст.

Ҳамзамон равғани бодомро метавон бо мақсади зебоӣ истифода бурд. Онро барои беҳтар намудани ҳолати пӯст ва мӯйи сар истифода мебаранд.

Ба гуфтаи мутахассисон, бодом бояд хушк бошад. Агар намӣ дошта бошад, он муддати дароз нигоҳ дошта намешавад. Бодомҳоро дар ҷои хунук ва торик, дур аз нурҳои Офтоб бояд нигоҳ дошт. Ҷойи беҳтарин анбори хӯрокворӣ ё яхдон аст. Онро дар зарфи шишагин сарпӯш намуда, дар яхдон гузоред, то муҳлати нигоҳдориаш бештар гардад.

Шаҳлои САДРИДДИН,
АМИТ «Ховар»

АКС аз манбаъҳои боз

Февраль 11, 2024 08:59

Хабарҳои дигари ин бахш

НАЗАРИ КОРШИНОС. Рушди ҳунармандӣ ба беҳтар шудани имконияти иҷтимоию иқтисодии оилаҳо мусоидат менамояд
ТАШАББУСИ ГЛОБАЛИИ ПРЕЗИДЕНТИ ТОҶИКИСТОН. Давлати мо пешоҳанги масоили ҳифзи пиряхҳо дар ҷаҳон мебошад
МАСЛИҲАТИ МУТАХАССИС. Нӯшидани чойи кабуд барои бемории дилу рагҳо, санги гурда, саратон ва қанд манфиат дорад
НАЗАРИ КОРШИНОС. Эҳёи ҳунарҳои мардумӣ ба зиёд гардидани соҳибкории хурд ва баланд шудани некӯаҳволии мардум мусоидат менамояд
МАСЛИҲАТИ МУТАХАССИС. Лимӯ давои бемориҳои онкологӣ, фишорбаландӣ, рӯдаю меъда ва асаб мебошад
ИЛМ ВА ЗАМОН. Рушди фанҳои табиатшиносӣ, дақиқ ва риёзӣ дар меҳвари таваҷҷуҳи ҷомеаи Тоҷикистон қарор дорад
1 МАРТ-РӮЗИ ҶАҲОНИИ МУДОФИАИ ГРАЖДАНӢ. Тоҷикистон соли 2016 узви Созмони байналмилалии мудофиаи гражданӣ гардид
САКТАИ ДИЛ АЗ САРДӢ. Ин бемориро чӣ гуна метавон пешгирӣ намуд?
МАСЛИҲАТИ МУТАХАССИС. Мавиз барои камхунӣ, асабоният, фаромӯшхотирӣ ва бемории дилу рагҳо давои хуб аст
МАСЛИҲАТИ МУТАХАССИС. Шахсони дорои вазни барзиёд ва гирифтори фарбеҳӣ бояд рӯзномаи вояи ғизо тартиб диҳанд
Ҷавонони ватандӯсти Тоҷикистони муосир — самараи фаъолияти Мактаби давлатдории муҳтарам Эмомалӣ Раҳмон!
МАСЛИҲАТИ МУТАХАССИС. Саидалӣ Гулов: «Дар ҳавои сард набояд корҳои башаклдарорӣ ва буриши дарахтон анҷом дода шаванд»