Табибони дастаҳои мунтахаби футболи Тоҷикистон дар конфронси тиббии ФИФА дар Бостон иштирок намуданд

ДУШАНБЕ, 12.02.2024 /АМИТ «Ховар»/. Табиби дастаи мунтахаби миллии Тоҷикистон ва «Истиқлол» — и Душанбе Фаррух Авезов ва табиби дастаи мунтахаби миллии занонаи мамлакат Гуландом Халилова дар конфронси тиббии Федератсияи байналмилалии футбол (ФИФА), ки дар Бостон (ИМА) баргузор шуд, иштирок намуданд. Дар ин хусус АМИТ «Ховар» бо истинод ба Федератсияи футболи Тоҷикистон иттилоъ медиҳад.

Конфронси тиббии Федератсияи байналмилалии футбол табибони соҳаи варзишро аз саросари ҷаҳон дар ин вохӯрии муҳим ҷамъ овард ва ба онҳо имконият дод, ки дар доираи талошҳои ФИФА ҷиҳати  таъмини дастрасӣ ба футболи тиббӣ барои тамоми иттиҳодияҳои миллӣ мубодилаи дониш намоянд.

Конфронси тиббии дурӯза дар Бостон ба охирин таҳқиқоти илмӣ ва дастовардҳои тиббӣ дар футбол, инчунин нақши ФИФА дар таҳкими саломатии бозигарон дар ҳамаи сатҳҳо бахшида шуд.

АКС: Федератсияи футболи Тоҷикистон