Дар Душанбе баҳри баланд бардоштани донишу маърифати ҳуқуқиву сиёсии ҷавонон ҳамоиш доир гардид

ДУШАНБЕ, 09.03.2024. /АМИТ «Ховар»/. Бо ибтикори Кумитаи кор бо ҷавонон ва варзиши назди Ҳукумати Ҷумҳурии Тоҷикистон ҷиҳати баланд бардоштани донишу маърифати ҳуқуқиву сиёсии ҷавонони фаъоли Ташкилоти ҷамъиятии «Пайравони Пешвои миллат» дар Вазорати маориф ва илми Ҷумҳурии Тоҷикистон ҳамоиш баргузор гардид. Дар ин хусус АМИТ «Ховар» бо истинод ба Маркази таҳлил ва иттилооти дастгоҳи марказии Кумитаи кор бо ҷавонон ва варзиши назди Ҳукумати Ҷумҳурии Тоҷикистон хабар медиҳад.

Роҳбарияти Вазорати маориф ва илми Ҷумҳурии Тоҷикистон ва Кумитаи кор бо ҷавонон ва варзиш иброз намуданд, ки ҷавонон неруи созанда ва пайравони асили сиёсати давлатии Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Ҳукумати Ҷумҳурии Тоҷикистон мебошанд.

Ҳукумати Ҷумҳурии Тоҷикистон барои ҷавонон тамоми шароити заруриро ҷиҳати таҳсил ва фаъолияти корӣ фароҳам овардааст. Таълиму тарбияи ҷавонон дар руҳияи ватандӯстиву меҳанпарастӣ ва рӯ овардани онҳо ба тамаддуну фарҳанги миллӣ яке аз самтҳои фаъолияти Вазорати маориф ва илм буда, вазорат барои амалигардонии он дар якҷоягӣ бо ниҳодҳои дахлдор аз тамоми имконияти мавҷуда истифода мебарад.

Дар идома аъзои ташкилоти ҷамъиятии «Пайравони Пешвои миллат» оид ба фаъолияти Вазорати маориф ва илм ба Вазири маориф ва илми Ҷумҳурии Тоҷикистон саволҳо пешниҳод намуда, ҷавобҳои мушаххас ва қонеъкунанда гирифтанд.

Қабл аз баргузории дарси кушоди омӯзишӣ ҷавонон-аъзои Ташкилоти ҷамъиятии «Пайравони Пешвои миллат» бо фаъолияти кормандони Вазорати маориф ва илм шинос шуданд.

АКС: Кумитаи кор бо ҷавонон ва варзиши назди Ҳукумати Ҷумҳурии Тоҷикистон