Дар Душанбе барои омодагии варзишгарон ба Бозиҳои олимпии Париж-2024 машғулияти омӯзишӣ оғоз гардид

ДУШАНБЕ, 14.03.2024. /АМИТ «Ховар»/. Бо ибтикори Кумитаи кор бо ҷавонон ва варзиши назди Ҳукумати Ҷумҳурии Тоҷикистон ва дар якҷоягӣ бо Муассисаи давлатии «Маркази такмили ихтисоси кормандони соҳаи тарбияи ҷисмонӣ ва варзиш» дар шаҳри Душанбе доир ба омодагии варзишгарон ба Бозиҳои олимпии Париж-2024 бо ҷалби мутахассисони хориҷӣ машғулияти омӯзишӣ оғоз гардид. Дар ин хусус ба АМИТ «Ховар» дар Кумитаи кор бо ҷавонон ва варзиши назди Ҳукумати Ҷумҳурии Тоҷикистон хабар доданд.

Дар машғулияти омӯзишӣ раиси Кумитаи кор бо ҷавонон ва варзиш, директори Муассисаи давлатии «Маркази такмили ихтисоси кормандони соҳаи тарбияи ҷисмонӣ ва варзиш», масъулини Кумитаи миллии олимпии Тоҷикистон, Донишкадаи тарбияи ҷисмонии Тоҷикистон ба номи С. Раҳимов, роҳбарони муассисаҳои тайёрии варзишии ҷумҳуриявӣ, сармураббиёни дастаҳои мунтахаби мамлакат, мураббиён ва намояндагони федератсияҳои варзишии намудҳои олимпӣ иштирок намуданд.

Машғулияти омӯзишӣ дар доираи нақшаи баргузории даврҳои такмили ихтисоси кормандони соҳаи тарбияи ҷисмонӣ ва варзиш мегузарад. Бо ин мақсад аз Ҷумҳурии Узбекистон 3 мутахассиси сатҳи байналмилалӣ дар самти назорати допингӣ дар варзиш, менеҷменти варзиш ва ҳаракати олимпӣ даъват гардидааст, ки давоми 3 рӯз ба мутахассисон раванди ин олимпиадаро меомӯзанд.

Раиси Кумитаи кор бо ҷавонон ва варзиши Тоҷикистон ба меҳмонону мутахассисони соҳаи варзиши Узбекистон барои гузаронидани машғулияти омӯзишӣ изҳори сипос намуд.
Изҳори боварӣ карда шуд, ки меҳмонону мутахассисони ҷалбшуда аз усулҳои нави корбарӣ ва таҷрибаи андӯхтаашон истифода бурда, ба шунавандагону иштирокчиён маҳорати заруриро вобаста ба самти фаъолият дар соҳаи варзиш меомӯзонанд.

Ёдовар бояд шуд, ки ҳадафи баргузории машғулияти омӯзишӣ тайёрии ҳамаҷонибаи мутахассисону варзишгарони тоҷик ба Бозиҳои олимпии Париж-2024 буда, он аз 13 то 15 март идома меёбад.

АКС аз сомонаҳои боз