Дар Кӯлоб даври шаҳрии озмуни «Кадбонуи беҳтарин» баргузор гардид

ДУШАНБЕ, 03.03.2024. /АМИТ «Ховар»/. Дар шаҳри Кӯлоб даври шаҳрии озмуни «Кадбонуи беҳтарин» баргузор гардид, ки дар он ғолибони даври муассисавӣ ва ҷавондухтарон фаъолона иштирок намудаанд. Дар ин хусус ба АМИТ «Ховар» дар Мақомоти иҷроияи ҳокимияти давлатии вилояти Хатлон хабар доданд.

Дар озмун муовини раиси шаҳр иброз дошт, ки тоҷикон аз замонҳои кадим ба таърих, эҷоди арзишҳои олии фарҳангӣ муваффақ шуда, дар саросари ҷаҳон ба унвони қавми тамаддунофар шуҳрат пайдо намудаанд.

Таъкид гардид, ки то кунун беҳтарин суннатҳо ва анъанаву оинҳои миллии мо, ки маҳфуз мондаанд, имрӯз бо шарофати соҳибистиклолӣ ва эҳёи онҳо моро ҳамчун миллати соҳиби маданияти қадимӣ ва дорои олитарин арзишҳои фикриву фарҳангӣ дар ҷаҳон мешиносанд. Ҳамзамон гуфта шуд, ки имрӯз беҳтарин ва нодиртарин суннатҳои фарҳангӣ-миллии мо дар муносибат ба кадбонугӣ, дастархонороӣ ва маърифати оиладорӣ дубора эҳё гардидаанд.

Озмуни «Кадбонуи беҳтарин» аз шартҳои гуногун, аз ҷумла қироати суруду таронаҳо дар васфи модар, омода намудани хамир ва буридани зувола, ороиши мӯй, ороиши дастархон, намоиши либосҳои миллӣ, парпечи кӯдак, омода намудани хӯриш аз сабзавоти тару тоза иборат буд, ки дар он ҳунару завқи кадбонуҳо пешкаши ҳайати ҳакамон гардид.

Тибқи Низомнома, озмун аз якчанд шарт — ороиши дастархони тоҷикӣ бо пешниҳоди таомҳои миллӣ, намоиши либосҳои миллӣ, қироати шеърҳо ва таронаҳо дар васфи Зан-Модар, маҳорати хондани суруди «Алла» ва маҳорати рақси якка иборат буд, ки иштирокчиён аз уҳдаи иҷрои шартҳои он ба хубӣ баромаданд.

Мақсад аз доир намудани чунин озмунҳо омода шудани ҷавондухтарон ба ҳаёти мустақилона ва расму оинҳои миллӣ мебошад.

АКС: Мақомоти иҷроияи ҳокимияти давлатии вилояти Хатлон