Дар Данғара мусобиқаи кушоди анъанавии ҷумҳуриявӣ оид ба гӯштини миллӣ баргузор мегардад

ДУШАНБЕ, 08.04.2024 /АМИТ «Ховар»/. 27 апрел дар Варзишгоҳи марказии ноҳияи Данғараи вилояти Хатлон бахшида ба Рӯзи ҷавонони Тоҷикистон мусобиқаи кушоди анъанавии ҷумҳуриявӣ оид ба гӯштини миллӣ (гӯштингирӣ) бо иштироки варзишгарони дохилию хориҷӣ аз рӯи се вазн- 65кг, 86кг ва +86кг баргузор мегардад. Дар ин хусус корманди Федератсияи гӯштини миллии «Гӯштингирӣ»-и Тоҷикистон Ҳалим Набизода ба шореҳи варзиши АМИТ «Ховар» хабар дод.

Дар мусобиқа паҳлавонони тоҷик Шарифҷон Назриев, Хуршед Маҷидов, Ҳақназар Назаров, Фирдавс Насимов, Шакармаҳмад Мирмамадов, Умар Расулов, Улуғбек Раҳимов, Саидшоҳ Раҳматуллоев, Қоим Шукронов, Абубакр Боқиев, Хайрандеш Муродзода, Суҳроб Боқиев, Мирзоҷамил Рамазонов, Субҳиддин Халилзода, Ҳамроз Раҷабов, Додохон Қурбоналев, Суҳроб Муҳаммадиев, Фарзиншоҳ Ҳусейнов, Ғаниҷон Ғаниев, Саидмухтор Расулов, Наврӯзи Каримзод ва дигарон иштирок намуда, ба ҳарифонашон маҳорати олии варзишиашонро нишон медиҳанд.

Ғолибонро туҳфаҳои пулӣ интизор мебошанд. Ба ғолибони ҷойи якуми мусобиқа 5000$, ҷои дуюм 3000$ ва ҷойҳои сеюм 1500$ тақдим мешавад.

Шуруъ аз даври дуюм ба ғолибони ҳар сабқат туҳфаи пулӣ тақдим мегардад.

Сарпарастони мусобиқа Клуби футболи «Истиқлол»-и шаҳри Душанбе, Федератсияи гӯштингирии Тоҷикистон ва Мақомоти иҷрояи ҳокимияти давлатии ноҳияи Данғара мебошанд.

АКС аз манбаъҳои боз