Дар Душанбе ҳамкории Тоҷикистон бо Малайзия дар самти омодасозии мутахассисони соҳаи фанноварии иттилоотӣ муҳокима гардид
![](https://khovar.tj/wp-content/uploads/2024/04/Aziz-Nazar-1.jpg)
ДУШАНБЕ, 25.04.2024/АМИТ «Ховар»/. Интизор меравад, ки Тоҷикистон ва Малайзия ҳамкориро дар соҳаи фановарии иттилоотӣ тавсеа диҳанд, хабар медиҳад АМИТ «Ховар» бо истинод ба Вазорати саноат ва технологияҳои нави ҷумҳурӣ.
Ин ва дигар масъалаҳои мавриди назари ҳарду ҷониб дар мулоқоти муовини Вазири саноат ва технологияҳои нави Ҷумҳурии Тоҷикистон Азиз Назар бо раиси Хадамоти таҳсилоти байналмилалии Малайзия доктор Абдул Разоқ Аҳмад дар Душанбе баррасӣ гардид.
Ҷонибҳо дар мулоқот ҳамзамон доир ба имконияти ҳамкории муассисаҳои таҳсилоти олӣ ва миёнаи касбии зертобеи Вазорати саноат ва технологияҳои нави Тоҷикистон табодули афкор намуданд. Доктор Абдул Разоқ Аҳмад омодагии Хадамоти таҳсилоти байналмилалии Малайзияро барои ба роҳ мондани ҳамкории илмӣ ва омодасозии мутахассисони соҳаи фанноварии иттилоотӣ байни ниҳодҳои соҳавии Тоҷикистон ва Малайзия изҳор намуд.
АКС: Вазорати саноат ва технологияҳои нави Тоҷикистон